Shillong, Risaw 31 : Ka Synjuk ki Rangbah Shnong ka Ri-Bhoi, kila pynshai ba kim don satia ia kano kano ka jingpyrshah ne don ka jingsngew ban pyrshah ia ka rai jong ka Sorkar ban pynkut ia ka tamasa Cherry Blossom ha ka Sngi U Blei.
Ia katei la pynsngew da ki nongialam jong ka Synjuk ha ka jingialang bad u Myntri ka tnad Jngohkai u Bah Paul Lyngdoh kaba la long ha Conference Hall jong ka Secretariat.
U General Secretary ka Synjuk Bah PB Sylliang haba iakren bad ki nongthoh khubor ha ka sngi Ba-ar, ula pyntip ba ka Synjuk kam don jingpyrshah satia ia ka sngi bala jied ban pynkut ia ka tamasa Cherry Blossom.
Ula batai ruh ba wat ka Dorbar Shnong ka Lumdaitkhla kala dep ai ia ka jingbit na ka bynta kane ka tamasa.
Hynrei ula ong pat, ka Synjuk kala shu ai jingmut ba ha ki snem ban wan, kan bha shibun ban nym pynlong shuh ia kane ka tamasa ha ka Sngi U Blei khnang ban burom lang ia ka jingsngew jong ki riew ngeit Khristan hapoh ka Jylla.
Wat hapdeng kane, ka Sorkar Jylla kala dep rai ha ka ban bthah ia ki nongpyniaid jong ka tamsa ba kin pynsdang noh ia ka tamasa ha ka por janmiet hadien bala wai lut ki Jingiaseng.
Ka tamasa Cherry Blossom 2023 ka dei kaba la buh ban pynlong ha ka 17-19 tarik Naiwieng ha Lumdaitkhla, Bhoirymbong, Ri-Bhoi District.
Hynrei ka rai ban pynkut ia ka tamasa ha ka sngi U Blei kala pynmih pynban ia ki jingpyrshah na ki katto katne ki kynhun, kiba iasaid ba ka Sngi U Blei ka dei ka sngi kyntang jong ki paid Khristan kiba don bun paid hapoh ka Jylla.
