Shillong, Rymphang 26: Ki dkhot jongka Shillong Bar Association hynne ka sngi Nyngkong kila leit ai da ka dorkhas ha u Myntri Rangbah ka jylla u Conrad K Sangma hadien ba ka ophis treikam jongka Shillong Bar Association kalashah bamduh ha ka ding kaba la klang bha ha ka miet jong ka sngi Saitjaiñ.
U Myntri Rangbah ka jylla haba pynpaw haka rynsan Social Media X, ula thoh “Ki dkhot jong ka Shillong Bar Association kila wan iakynduh ia nga ban pynsngew halor ka jingjia kaba ka ding kala pynjulor lut ia ka ophis treikam ka jongki”.
Ula iathuh ba kane ka kynhun jong ki nongiasaid aiñ kala aiti ia ka dorkhas bad ia kane yn sa khmih bniah da ka tnad kaba dei khmih.
Kane ka kynhun kala kyrpad ia u Myntri Rangbah ba un ai jaka treikam ba shipor bad ruh ban mang pisa noh mar mar na ka bynta ban tei thymmai ia ka Shillong Bar Association na ka bynta ka jingmyntoi ki dkhot ka Bar, ki paidbah bad ka jingiaid beit ki jingtreikam jong ki Iingkashari hapoh ka District.
Na ka liang u Myntri Rangbah ula kular ban ai ia ka jingkyrshan bad jingiatrelang ba pura halor kane ka kam bad ba un thaw ia ki lad ki lynti ban leh eiei halor ki jingeh jong ka Association.
Kane ka kynhun kala iakynduh ruh ia ka Myntri ka tnad Ain Kong Ampareen Lyngdoh, kaba la pynpaw ia ka jingsngewlem halor kane ka jingjia bad kular ban ai ruh ka jingkyrshan ba pura nalor ban wad ia ki lad jingiarap ba mardor ia ka Association.
Lah ban kdew ba ka ophis treikam jongka Shillong Bar Association ka dei kaba la tei naduh u snem 1913 bad kadei kawei na ki ophis jong ki nongiasaid aiñ kaba la rim tam hapoh ka ri.
Kane ka ophis treikam kala shah bam duh ha ki thylliej ding ha ka miet jong ka sngi Saitjaiñ bad kane ka jingpluh kala jia ha ka por kumba 10:15 mynmiet.
Da ki hajar tylli ki kot mukotduma kiba kynthup ia ki kot ki sla kiba naduh u snem 1900 kila shah pynjulor ha ka ding kaba la klang bha kaba la bamduh syndon ia ka ophis baroh kawei.
