Iakynduh ka MRDSTA ia u CM, dawa bai bam tynmen ban lah kyrshan ia ka Iing ka sem

Shillong, Risaw 18: Ki nonghikai Deficit bala shongthait ka Jylla kiba don hapoh ka lama jong ka Meghalaya Retired Deficit School Teachers Association (MRDSTA), hynne ka sngi Balang, ki la kynduhn ia u Myntri Rangbah ka Jylla u Conrad K Sangma ban buddien haba iadei bad ka jingdawa bai bam tymmen (Pension).

Haba kren sha ki lad pathai khubor u President ka MRDSTA bah E.D Nongsiang u la iathuh ba ki don kumba 2000 ngut ki nonghikai deficit ba la shongthait hapoh Meghalaya kiba dang ap khmih lynti ban ioh Ia ka bai bam tymmen (Pension) naka sorkar.

U bah E.D Nongsiang u la iathuh ba kane ka jingdawa ban ioh bai bam tymmen, ka la don kumba 50 snem hynrei haduh mynta ka sorkar jylla kam pat shim ia kano kano ka sienjam ban pyllait ia ka song pisa.

“Kane ka jingdawa ka dei kaba la slem bha bad kum ki nonghikai Deficit bala shongthait, ngim don eiei shuh ban pyndap ha iing hasem bad dei namar kane ngi wan kynduh ia u Myntri Rangbah ban buddien ia kane ka jingdawa” ong u bah E.D Nongsiang.

Haba kylli u Bah Nongsiang ula iathuh ba watla u Myntri Rangbah ka Jylla u khlem ai kano kano ka jingkular hynrei ula pyntip sha ki ba shen un sa lum ia ka jingialang bad ki ophisar ka tnat pule puthi ban buddien ia kane ka jingdawa.

Ula iathuh ba ki nonghikai ki khmih lynti ba naka liang u Myntri Rangbah un sa leh iaka ba donkam bad un sa khot biang iaki ban iakren halor kane ka mat jingdawa.