Shillong, Naiwieng 17: Ka KSU Laban Circle ha ka 16 tarik u Naiwieng kila iakynduh ia u MLA ka South Shillong Constituency Bah Sanbor Shullai ban pynpaw ia ka jingsngewkhia halor ka jingioh wan rung ki mynder ha ka thaiñ bad iaka jingdonkam ban tehlakam ia ka.
Ha katei ka jingialang ki nongialam ka KSU ha ryngkat ka jingdon lang u MDC barim ka Laban Constituency Bah Ricky Shullai, kila iakren ia ka jingma iaka shnong Laban baroh kawei namar ka jingjur ka jingwan rung ki mynder bad kila pynpaw ba donkam ban shim ia ki lad ki lynti ban tehlakam bad ban trei ryngkat bad ki tnad pulit bad ki nongialam shnong ban leh eiei ia kane ka bynta.
Ka KSU Laban Circle kala pynsngew ruh ia ka jingma halor jingngop jong ki samla ha u droks bad iaka jingdonkam ban buh iaka Rehabilitation Centre kaba biang bad ban don iaki Councellor kiba biang ban lah ban ai jinghikai ia ki samla ba la ngat ha une u jingdih ba kin lah ban lait bad kylla noh ka jingim ka jong ki.
Ki nongialam ka seng kila pynpaw ruh iaka jingpyrshah halor ka jingai kyrteng ka Naming Committee jong ka Sorkar Jylla ia ki ar tylli ki surok kata ia ka “Ardhendhu Choudhary Road” ha u snem 2020 kaba don ha Dorbar Shnong Laban bad “Bhaskar Choudhary Road” ha u snem 2022 kaba don ha Dorbar Shnong Laban.
Ki nongialam ka KSU, kila pynpaw ba ka Seng naduh ka sngi ba nyngkong ka la ïeng pyrshah ba kam sngew iahap satia ban ai nam ia ki surok sha kiwei pat ki jaitbynriew haba pyntip ruh ba kala dep phah ruh ia bun tylli ki dorkhas sha ki tnad ba dei peit halor ka kane ka bynta.
Kila pynpaw ba u Bah Sanbor Shullai ula mynjur ban weng noh ia kine ki kyrteng jong kine ki surok kiba la ainam sha ki jaitbynriew bym dei riewlum.
