Shillong, Risaw 25: Ka Khasi Student Student Union (KSU) Monitoring Cell hynne ka sngi kala kynduh ia u Chief Secretary ka Jylla Bah D P Wahlang ban phah tuklar ha ka ban pynthymmai iaka rukom treikam jong ki District Selection Committee (DSC) ban wanrah ia ka jingkhuid, ka jingshai bad ka jingshaniah ha ka rukom pynlong ia ka eksam thungkam thungjam.
Ka Monitoring Cell jong ka KSU haka jingialam da u President samla Lambokstar Marngar kala buh haduh 15 tylli mat jingdawa lane ki sienjam baka Sorkar kadei ban shim ban pynthymmai iaka rukom treikamha ki District Selection Committee (DSC).
Ha ba kren shaki lad pathai khubor u samla Lambok u la ong, ka KSU kam shem la shong khli kti bad kan iai dawa naka Sorkar Jylla ban pynthymmai ia ka rukom treikam hapoh ka Meghalaya Public Service Commission (MPSC) nalor ki DSC.
Ula iathuh baka CEC kala bthah ia baroh ki shnat treikam ka seng ban kynduh ia ki Deputy Commissioner (DC) ha man ki District ban ai jingmut ha kaban pynthymmai bad pynbha iaka rukom treikam jong ki DSC.
“Ngi kwah ba ka rukom thungkam thungjam nadien jingkhang (Back Door) kan kut noh, ka jingiadei bad ki heh ki hain kan kut noh. Ngi kwah ba ki briew kiba dei hok ban ioh ia ka kam, kin ioh ia ka kam” ong u Bah Lambokstar.
U President ka KSU u la kynnoh ba ka don ka jingud naki paidbah ba ka jur palat ka jingthungkam thungjam ia ki briew ki ba don jingiadei bad ki MLA, MDC ne ki briew Sorkar bad u la bynrap daka ba ong “Ngim ioh ia ka sabut pyrshah ia ki ba shu shah thepkam tuh hynrei katkum ka ktien ka ong wei ba kadon ka khana kadon beit ka jingjia kumba ong, wei ba ka don ka tdem ka ding ruh ka don bad haba ki sla ki hap dei ba khih ka lyer”.
U samla Lambokstar u la ong baka KSU ka la ai jingmut sha u Chief Secretary, ba haba lait ki kam, ka Sorkar kadei ban pynmih da ki jingpynbna (Advertisement) khnang ba ki samla kin ioh ban thep ia ki kam bapher bapher.
“Ka seng kan iai dawa pynthymmai ka rukom treimkam ka MPSC, bad ban pynthikna baka rukom thungkam thungjam wat hapoh ki DSC kadei ban long khuid long suba” u la ong.
Lah ban kdew hangne, ba ka KSU kala aiti ia kane kajuh ka dorkhas sha baroh ki Deputy Commissioner jong ki District ka Ri-lum Khasi Jaintia ban wanrah ia ka jingkhuid, ka jingtreikam kaba shai bad ka jingtreikam kaba shaniah jong ki DSC ha ka jingpyniaid ia ki eksam thungkam thungkam hala ki jong ki District.
Kine ki jingdawa ki kynthup ia ka jingthung kham bun ia ki Non-Official Vice Chairmen bad Non-Official Member ha ki DSC ki bym don jingiadei bad ki seng sain pyrthei, ban pynthikna ba ki nongaplai kam ki dei ban dei ki nong Meghalaya bad ba nang ban kren ia ka Ktien Khasi-Jaintia, ban pynmih da ka calendar ia ki sngi ban pynlong ia ki eksam thungkam, ban pynmih paidbah ia ki mark ba ioh da ki kyrtong ba iakhun eksam, ban ym pynkylla ia ki roll nombor, ban ai carbon copy ia ki OMR sheet sha ki kyrtong, ban pyllait ia ki answer key hadien ka eksam, ban ring video ia ka eksam bad interview bad ban pyndep ia ka jingthungkam hapoh ka 6 bnai naduh ka sngi ba pynmih ia ka jingpynbna laitkam bad kiwei kiwei.
 Monitoring Cell hynne ka sngi kala kynduh ia u Chief Secretary ka Jylla Bah D P Wahlang ban phah tuklar ha ka ban pynthymmai iaka rukom treikam jong ki District Selection Committee (DSC) ban wanrah ia ka jingkhuid, ka jingshai bad ka jingshaniah ha ka rukom pynlong ia ka eksam thungkam thungjam.){kind=link}