Shillong, Nailur 13: U Chief Executive Member (CEM) ka Khasi Hills Autonomous District Council (KHADC) bah Pyniaid Sing Syiem ula iathuh ba ula dep iakren bad u Chief Executive Member (CEM) ka Karbi Anglong Autonomous Council (KAAC) ban pynthikna ba ki jaidbynriew Khasi kiba sah ha Block II, kim dei ban shah pynwit ne pyndik katba ym pat dep iapynbeit ia u pud u sam.
Haba kren sha ki lad pathai khubor u bah Pyniaid ula iathuh ba haka jingiakren bad u CEM ka KAAC, ula ioh ka jingpynshai baka KAAC kan shim khia bha ha ka ban pynthikna ba ki jaidbynriew Khasi-Pnar kiba sah ha Block II kim dei shuh ban shah pynthut.
“Kum u CEM ka KHADC, nga la pynsngew sha u CEM ka KAAC ba katba ym pat lah ban pynbeit ia u pud u sam hapdeng ka Meghalaya-Assam, la donkam ban don ka jingiasngewthuh jingmut hapdeng ki artylli ki district council khnang ban nym mih kano kano ka jingkulmar ne ka jingshah pynwit/pyndik ki jaitbynriew Khasi-Pnar kiba sah ha Block II” ong u bah Pyniaid.
U bah Pyniaid Pyniaid ula iathuh ba iaka mynta kaba donkam hi kadei ka jingiatreilang hapdeng ki artylli ki district council naka bynta ban wanrah bad pynneh iaka shong suk shong shngain haki thain khappud.
Naka liang u Executive Member ka KAAC ba khmih iaka tnat Education Richard Tokbi ula iathuh ba naka liang ka KAAC ka kloi ban iatreilang bad ka KHADC ne kino kino ki district council jong ka Meghalaya naka bynta ban pynneh iaka shong suk shong shngain ha ki jaka iakajia pud.
U Richard ula ong ba naduh ki por jong ka sorkar phareng ki Khasi, Jaintia bad Karbi ki don iaka juh ka Histori hynrei kane ka jingioh sngew ba don jingkulmar haki thain khappud kadei hi namar ka jingshim kabu tang da ki katto katne ngut kiba kwah ban pynthut iaka shong suk shong shngain.
“Donkam ban ithuh kum ia kine ki briew kiba kwah ban pynthut iaka shong suk shong shngain namar ka jingpynbeit ia u pud u sam kadei hi lyngba ka jingiakren halor ka meij hapdeng ki artylli ki sorkar jylla bad ki district council” la ong u Richard.
