Shillong, Naitung 05: Ka Federation Riwar Mihngi Local Dorbar (FRMLD) hynne ka sngi kala kynduh ia u Myntri ka tnad Social Welfare bah Paul Lyngdoh bad dawa ia ka Sorkar ba kan thaw noh daka Village Task Force Committee (VTFC) na ka bynta ban pynkhlain iaka jingiakhun pyrshah ia u drok hapoh ka thain Pynursla baroh kawei.
Haba kren sha ki lad pathai khubor u Publicity Secretary ka FRMLA bah Edmund Khongngai u la ong ba haka jingiakren bad u u Myntri ka tnat Social Welfare, naka liang ka seng ka la pynpaw ia ka jingsngewkhia halor ka jingioh jingtip ba ka Pynursla ka dei kawei na ki ktem lane Hotspot ba jur ka jingdih bad khaii drok.
U bah Edmund ula iathuh ba ha kane ka jingiakynduh kila pynpaw ha u Myntri ban buh noh ka Village Task Force Committee ka ban ia treilang bad u SDO, BDO, kumjuh ka tnat Pulit bad ki nongshongshong jong ka thaiñ na ka bynta ban iakhun pyrshah ia une u jingdih ba pynjot ia ki khun samla ka dong ka thain bad ka jylla baroh kawei.
“Ka jingdon ka Village Task Force Committee, ki Dorbar kin ioh ka bor ban iatreilang bad u SDO, BDO bad ki Pulit ban rat dkhong ia u drok napoh ka thain Pynursla bad haka juh ka por ka Committee kan pynlong ruh iaki kynja jingialang ban pynshai paidbah lane Awareness Program ha ki skul, ki jaka pule, ha ki iew ha ka thain Pynursla khnang ba ki paidbah kin ioh jingshai bad kin sngewthuh ia ka jingma naka jingdih ia une u jingdih pynbuaid” ong u bah Edmund.
U bah Edmund ula pyntip ruh ba haka jingiakren bad u Myntri, ka FRMLD kala kyntu ban buh noh da u Number Phone lane Toll Free Number na ka bynta ba ki riew paidba ba kin lah ban phah jingtip sha ka tnad Social Welfare bad ruh sha ki Pulit haba iadei bad u drok ha ka thain Pynursla.
Ula ong ruh baka Dorbar kala kyntu ia u Myntri ban bthah iaki Pulit ba kin pynlong iaka jingtalasi iaki kali ba leh ia ki kam khaii sha Bangladesh namar ka lah ban long ba kine ki kali ki lah ban don bynta haka jingkhaii ne wanrah drok shapoh ka thain bad shapoh ka jylla.
Pule lang ia kane: Manipur: Hadien 2 bnai duna, la plie biang ia ki skul naduh klas 1 haduh klas 8
