Shillong, Nailur 13: U Myntri ka Tnad ka Koit ka Khiah James K Sangma hynne ka sngi ba-ar ula pyntip ba ka Sorkar Jylla kala iakren mynta bad ka kompani thymmai ka ban lah ban ai ka jingiateh kaba biang ha kaban pynthikna ba ka jingtei ia ka Shillong Medical College (SMC) kan long kaba seisoh bad ka bym kylla long ka jingtei ba sepei.
Haba jubab ia ka jingkylli ha Iingdorbar, u James ula pyntip ba ka project ban tei ia ka Shillong Medical College ka dang iaid ha ka jingpynkhreh ban pyntrei noh.
“Ka Sorkar ka dang wad ia ki lynti thymmai kynthup ka jingwanrah ia ki kyndon kiba biang jong ka Public-Private Partnership (PPP) bad ruh ka lad ban pan jingkyrshan na ka DEA-NITI Aayog, ka Sorkar India” ula bynrap.
Lah ban kdew hangne ba ka Sorkar Jylla kala dep buh mawnongrim ban tei ia ka SMC ha RP Chest (TB) Hospital hadien ka jingiasoi soskular bad ka Kompani KPC Group ha u snem 2012.
Hynrei u Myntri ula pyntip ba ka Sorkar Jylla kala ai mynta sa kawei ka jaka ba 50 acre ha New Shillong Township na ka bynta ban tei ia ka SMC hadien ba ia ka jaka ha RP Chest Hospital, Nawbah la lap ba kam long satia kaba biang. Ula pyntip ia kane haba jubab ia ka jingkylli bynrap bala wanrah da u MLA ka North Shillong Bah Adelbert Nongrum.
U James u ong ba ka jaka ha Mawbah, kaba don ha RP Chest Hospital ka don shibun palat ki jingeh. “Ka surok ban leit sha kane ka jaka ka khim palat bad kan sa buh ia ka jingeh hadien habud. Ka jaka ruh ka long kaba khapngiah bha bad kan sa ktah jur ia ka jingtreikam jong ka College” ula bynrap.
U Myntri u pyntip ruh ba kane ka jaka kam iahap satia kat kum ki kyndon jong ka Medical Council of India (MCI).
“Ka Sorkar Jylla kala shim ia bun ki sienjam ban pynthikna ba kane ka project kan treikam noh. Ngi la dep pynban ia ka PPP bala iasoi bad ka KPC Group bad mynta ngi dang iakren bad ka kompani thymmai kaba lah ban ai ha ngi ia ka jingiateh kaba biang” ula ong.
U James ula kyrpad ruh ia u Lamphang ka Iingdorbar ban weng noh ia ka jingkren jong u Bah Adelbert Nongrum kaba u ong “Ka jingslem ban pynieng ia ka Medical College ka dei namar ka jingbym shimkhia jong ka Sorkar hynrei ngi la iohi pat ia ka jingkloi ban pynieng ia ka Ophis jong ka Party”.
Ka rai jong ka Sorkar ban pynkynriah ia ka jaka sha New Shillong Township kam shym la pynsngewtynnad satia ia u MLA ka West Shillong Bah Mohendro Rapsang uba la dawa ba kane ka College ka dei beit ban buh ha Mawbah namar ia u Mawnongrim la dep buh ha kane ka jaka.
“Khlem artatien ba ka dei kaba khapngiah hynrei shisien ba phi la rung shapoh, ka dei ka jaka ba heh bad ba thylli” ula pynksan.
Halor kane, u Myntri ula kyntu ia u Dkhot ban peit ia kane ka kam na ka bynta ka jingmyntoi jong ka Jylla baroh kawei ym tang ia kawei ka Constituency.
U Bah Rapsang ula kyrpad ia ka Sorkar Jylla ba naba kane ka jaka ka dei kaba la thmu tang ia ki jaka ai jingsumar, wat ai ba kin mih da kiwei kiwei ki jingtei ha kane ka jaka ia kaba u Myntri ula ong ba kam shym pat don kano kano ka jingtyrwa ka bym dei ia ka koit ka khiah kaban wanrah ha kane ka jaka.
Haba u MLA ka Umroi Bah George B Lyngdoh ula kylli ia ki daw ba lam sha ka jingpynduh noh ia ka PPP bad ka KPC group, u Myntri ula ong ba ka jaka ka dei kawei na ki mat ki bym poi sha ka jingiamynjur lang.
“Ki (KPC Group) ki kwah kham bun ka jaka ia ka project bad ban pynlan ia ka jingshimrai n aka 30 snem sha ka 99 snem nalor ban kyntiew ruh ia ka bai rung klas” ula ong.
