Iakhih ki samla pule NIT Sohra | Bitar ba mih kor-um ha ki kamra | Per ki skain ha ka bam ka dih

Shillong, Lber 17 : Ki samla pule ka National Institute of Technology (NIT) Meghalaya, kila pynlong ia ka jingiakhih ha ka sngi Nyngkong namar ka jingbym lah pynbiang ki bor pyniaid ia ki jingdonkam ba man ka sngi jong ki samla hapoh ka Campus ha Sohra.

Ki samla pule kiba la iashong kyllain mungor hakhmat ka Ophis Administrative Block, kila pynpaw ia ka jingsngewkhia halor ka jingbym khuid ka bam ka dih, ka jingbym khuid ka sawdong sawkun, ki jingbym don ka gym ia ki samla pule kynthei, ka jingthut ka bording bad Wifi nalor ka jingtrei torti ia ka jingtei kaba lam shaka jingjrein/pei um ha ka por ba jur slap.

Na ki durkhmih (video) bala ring da ki samla pule, la pyni ia ka um kaba mih kum ka kor um hapoh ka kamra bad mih ruh kum ka shyng-iar na ki socket bording ha ka kamra jong ka Hostel ki shynrang.

Ki samla pule kila dep phah teng ia ka shithi sha u Director ba pynpaw ia baroh ki jingsngewkhia hynrei ym shym la leh eiei satia haduh mynta. Kane ka jingmynthei kala pynbor ia ki samla pule ban shim ia ka lynti jong ka jingiakhih.

Nalor kane, ki samla pule kila ujor ruh halor ka jingbym ioh ia ka umbam umdih kaba khuid bad ka jingbym don ki lad ai jingsumar haba kem pang kynsan kynsan.

Ka jingujor kala kdew ia ka jingsma iwtung ong ka um, ka jingduna jong ki nongtrei ba pynkhuid ia ka campud bad ka jing sngew baheh jong ki nongsam bam kiba ju kyntait ban ai tam ia ka bam haba pan.

Ka dur bala shon da ki samla pule ka pyni ruh ba u dai bala ai bam sha ki samla pule u dei uba dap da ka um kum ka syrwa, kaba iasyriem ia ka syrwa shynrai ha ka jaka jong u dai. Ha kawei na ki dur, la iohi ruh ia u skain uba dem ha ka jyntah dohkha kylla.

Haba iadei bad ka WiFi connection, ki samlapule kila iathuh ba man ka Sngi U Blei, ki bor pyniaid kim ju ai satia ia u WiFi bad ha kiwei kiwei ki sngi, kaba bun hi ka dei ka jingthut, kaba la ktah bha ia ka kam wad bniah (research work) bad ka pule dangle.

Lah ban kdew ba ia ka NIT Meghalaya la pynkynriah na ka campus ba shipor ha Shillong sha Sohra ha ka 16 tarik Kyllalyngkot mynta u snem.

Haba bitar ia ka jingshimpor ban tuklar, ki samla pule kila dawa ia ki bor pyniaid ba ki dei ban leh eiei noh mardor, haba ban jur ba kum kine kiei kiei baroh kila pynthut ia ka pule ka dangle bad pynthohbria ia ka nam jong kane ka jaka pule.