Shillong, Aug 18: Ka North East Student Organizations (NESO) hynne ka sngi Nyngkong kala pynlong ia ka ‘sit-in-strike’ ha baroh ki nongbah jong ki jylla ka thain Shatei LamKihngi kynthup ha Shillong, Meghalaya, ban pynbor ia ka Sorkar India bad ia ki Sorkar Jylla ba kin shimkhia mar mar ban iada ia ki trai ri trai muluk da kaba pynsangeh mardor ia ka jingwan rung tuh ki poi ei na ka ri Bangladesh.
Haba iakren bad ki nongpathai khubor ha ka jingpynlong ia ka jingiakhih hangne ha nongbah Shillong, u Chairman ka NESO Bah Samuel B Jyrwa ula ong ba kane ka jingiakhih ka long ban dawa na ka sorkar ban shimkhia mardor ia ka mat jong ka jingwan rung kyrthep ki mynder ri, kaba la long kum ka khlam jingpang ia ka thain mynta lah da ki phew snem.
“Ngi lah mad ia kane ka jingeh na ka jingwan rung kyrthep ki mynder ri ha kylleng ki khappud khamtam eh na ri Bangladesh sha ki jylla jong ka thain Shatei Lam Mihngi. Ngi lah iohi ia ka jingjia hapoh ka jylla Tripura, Assam bad wat ha Meghalaya, ngi lah sakhi ia kiba bun ki jingiaumsnam bad ki jingiakhih paidbah pyrshah ia ka jingwan rung be-aiñ ki briew na ri Bangladesh. Kumta kane ka jingiakhih ka long ban dawa na ka sorkar India bad kumjuh ia ki sorkar jong ki jylla ka thain Shatei Lam Mihngi ban shimkhia ia kane ka mat kaba kongsan bad ban shim mardor ia ki sienjam kiba tyngeh ban pynsangeh ia kane ka jingwan rung tuh” ong u Bah Samuel Jyrwa.
U Bah Samuel Jyrwa ula ong ruh ba u Myntri Rangbahduh ka ri ha ka 15 tarik u Nailar 2025 ula kubur ia ka jing ktah ka jingwan rung be-aiñ ki poi ei iaka ia ka jingdon ki nongshongshnong ha ka thain Shatei Lam Mihngi ka Ri.
“Namar ba u Myntri Rangbahduh ka ri ula kubur ba kane ka mat ka long kaba khia bha, ngi kyrmen ba ka sorkar India kan shim ia ki sienjam kiba tyngeh halor ka nongrim ban iada ia ka bha ka miat jong ki jaidbynriew riewlum ka thain Shatei Lam Mihngi” ula ong.
Ha kaba iadei bad ka jingbym lah ka sorkar pdeng bad ka sorkar jylla ban shim ia ki sienjam ban pyntreikam ia ka Inner Line Permit (ILP) ha Meghalaya, u Bah Samuel Jyrwa ula ong, “Ka jingdawa ia ka ILP kadei kaba la rim bha. Ka Khasi Students Union (KSU) kala dawa naduh u snem 1983 hynrei kaba sngewsih ka long ba ka Sorkar India bad ka Sorkar Pdeng kaba mynta kim pat mynjur satia ban pyntreikam ia ka ILP ha kylleng ki jylla jong ka thain Shatei Lam Mihngi bad kumjuh ruh hapoh ka jylla Meghalaya.”
Ka NESO kan sa pynlong ia ka jingialang ban shim shuh shuh ia ki rai nangne shakhmat bad yn sa pynbna sha ki paidbah.
 hynne ka sngi Nyngkong kala pynlong ia ka ‘sit-in-strike’ ha baroh ki nongbah jong ki jylla ka thain Shatei LamKihngi kynthup ha Shillong, Meghalaya, ban pynbor ia ka Sorkar India bad ia ki Sorkar Jylla ba kin shimkhia mar mar ban iada ia ki trai ri trai muluk da kaba pynsangeh mardor ia ka jingwan rung tuh ki poi ei na ka ri Bangladesh.){kind=link}