Iakhih ka INC hakhmat Ophis ka BJP pyrshah ia ka jingpynlong atiar ialeh ia ka MGNREGA

Shillong, Nohprah 19: Ki nongialam bad ki dkhot ka seng Congress hynne ka sngi Thohdieng, kila leit ban pynlong ia ka jingiakhih hakhmat ka ophis treikam ka Bharatiya Janata Party (BJP) Meghalaya ban pyrshah ia ka sorkar pdeng halor ka jingpynkylla ia ka kyrteng jongka Mahatma Gandhi National Rural Employment Guarantee Act (MGNREGA).

“Ka jingpynsangeh ia ka MGNREGA bad ka jingpynkylla sha ka ‘Jayramji’ kam dei tang ka jingpynkylla ia ka kyrteng, kadei ka jingktah ia hok jong iwei pa iwei I nongshong shnong” ong u Secretary ka Meghalaya Pradesh Congress Committee (MPCC) u Bah M Badwar haba iakren bad ki nongthoh khubor.

“Kane ka ain kaba thymmai kala weng noh ia ka jingpynthikna ia ka jingioh bylla shispah sngi, kan pynduh ia ki lad ai kam katkum ka bor jong ka sorkar da kaba pynshong nongrim ia ka jingdon ia ka pisa”.

U Bah Badwar ula byrngem ba kane ka jingleh kan ktah jur ia ki atiar jong ki skhim na ka bynta ka bha ka miat, da kaba pynkylla sha ka atiar sain pyrthei ban ioh pyndonkam da kaba shu ia jied.

“Ki shnong ki thaw kin shah ktah jur da kaba pynshong nongrim.katkum ka mon jong ka seng kaba lam ia ka jingsynshar. Ki nongshong shnong kiba shisien kiba la thikna ban iohkam mynta ki lah ban shem ialade khlem kam shuh, kaban pynmih ia ka jingeh kaba khraw ia ki iing ki sem ki jongki bad kan pynbor ia ki longiing ban ngam ha ka jingshim ram” ula ong.

Ula pynpaw ba kan don ruh ka jingktah kaba iar, ki khynnah kin hap ban iehnoh ia ki skul ban leit wadkam, ka bai bylla ha nongkyndong ka lah ban hiar dor namar ka jingbym don ki kam bylla bad ki nongairam ki lah ban shimkabu ia kiba shem lanot namar ka jingduk”.

Ha Meghalaya, kiba bun ki shaniah ha katei ka skhim 100 sngi bad kane ka lah ban pyndkoh ia ka ioh ka kot jong ki longiing longsem” ong u Badwar.

Ula khot la wer ia ki seng ha ka liang pyrshah ban iatylli bad kyntu ia ki sengbhalang bad kiwei kiwei ki seng sain pyrthei bad ia ki paidbah ban iashimbynta ha ka jingiakhih.

“Ngi ngim dei ka jylla kaba riewspah, ka per‑capita GDP kadei kaba rit tam hapoh ka ri. Ngi hap ban ieng ban iada ia ki nongshong shnong na kane ka jingshah kput ka Congress bad ia ki nongrim jong u Mahatma Gandhi,” ula bynrap.