Shillong Jymmang 14: U Symbud Myntri Rangbah ba khmih ia ka tnad Urban Affairs, Bah Sniawbhalang Dhar hynne ka sngi Ba-ar, ula pyntip ba ka jingpyntrei ia ka Smart City Project kala iaid bha shakhmat hynrei ka Smart Road ka dei kawei ka project kaba la pynmih shibun ki jingeh.
U Bah Sniawbhalang ula iathuh ba ki don haduh 17 tylli ki project bala pyntrei lyngba ka Smart City Project kiba kynthup ia ka jingshna ia ki jaka pynieng kali ne Parking Lot kiba lah jan dep bad kiba dang iaid shakhmat, ka Rain Water Harvesting bad kiwei kiwei.
Ula ong, haba khein kyllum lang, jan baroh ki projek kila iaid beit shakhamt hynrei kaba suki ka dei ka jingpyntrei ia ka Smart Road namar ka jingbym ioh jaka.
“Ngi khmih lynti ba ki kam bala pyntrei baroh kin dep noh hapoh 80% eiei ha une u snem ba mynta” ula ong.
Haba kren halor ka Smart Road, u Symbud Myntri ula ong “Ka jingslem jong ka project ka don bun ki daw kiba kynthup ia ka jingiatakhuh bad ki jingkyntur pud u paidbah, ka jinghap pynkynriah ia ki post bording elektrik, ka jinghap khang ia ki kali ban iaid ha ki jaka ba khim bad kiwei kiwei”.
Ula ong ruh ba ki tnad sorkar ki lah ban shong jingialang na ka bynta ban pynbeit ha kaba iadei bad ka jingpyniaid ryntih ia ki pipe um, ki sainar elektrik bad kiwei kiwei namar kane kala buh ha ka jingeh kaba khraw ban pyniaid sted ia kane ka project.
Halor ka jingslem ka surok Smart Road ha Lachumiere, u Symbud Myntri Rangbah ula pyntip ba ka daw ka dei namar ka jingbym ioh jaka bad ka Sorkar ka dang khmih bniah biang ia kane ka project.
