Shillong, Jymmang 26 : U Superintendent of Police ka East Khasi Hills Bah Vivek Syiem, ha ka sngi Nyngkong ula pyntip ba ka jingwad kala iaid shaid shaid ban lapdien ia ki shikurim ba na Indore-kiba jah rngai ha Sohra.
Kine ki shi kurim ki dei u Raja Raghuvanshi bad ka Sonam Raghuvanshi.
Kat kum ka jingiathuh u Bah Vivek, ia kine ki shikurim la iohi khatduh ha ka sngi Palei ka 22 tarik Jymmang. Kila wai ia ka scooty Yamaha na Keating Road, Shillong bad leitkai sha Mawlakhiat. Nangne, kila hiar sha Nongriat bad sahmiet ha ka Shipara Homestay.
“Kine ki shikurim kila mih na Nongriat ha ka por mynstep kumba 5:30 baje eiei bad kila wanphai la Mawlakhiat” ong u bah Vivek haba bynrap “Hynrei, ia ka scooty la pyntip hadien ba la shu ieh ha Golden Pines Dhaba, Sohra Rim da ki nongshongshnong, ha ka 23 tarik Jymmang”.
Ia kane ka scooty kaba dang don lang bad u shabi, la aiti noh sha ki Pulit ka Sohra. Hadien kane, la pyntip sha ka Police Control Room bad hadien ki bahaiing hasem kila pyntip ia ka jingjah rngai jong kine ki arngut ki shikurim.
U Bah Vivek u pyntip ba ka jingwad ia kine ki shikurim kala iaid shakhmat. “Ngi la pyntip ia baroh ki kynhun kynthup ki shnong ba marjan bad ki Pulit lem bad ki Home Guard kila don sha ki jaka ba marjan ka Sohra Rim ban wad ia kine ki briew”.
Haba kylli la ka don ka jingsuba shah leh sniew, u Bah Vivek ula ong “Ia mynta hi, ka dang kloi palat ban ong eiei. Ka kam ba hakhmat eh ha ngi ka long ban lap shuwa ia ki. La iohi khatduh ia ki ha Nongriat bad kila mih noh ha ka step kaba bud. Ngi dang pyrshang ban buddien ia ka leit ka wan jong ki”.
U Baj Vivek u pyntip ba ki bor Sorkar kila dep pynmih ia ka jingbthah ia ki nongwan shangkai sha Sohra ba kin long kiba phikir bha ialade. “Ha ka jingshisha, kila shim ia u nongialam lynti (guide) na Mawlakhiat sha Nongriat. Hynrei, ha ka por ba ki wanphai, ym shym la shuh ba ialam lynti ia ki. Ka jingshem ia ka scooty ba shu ieh ha ryngkat u shabi ka long kaba eh ban batai bad ka jingwad ia ki kala iaid shakhmat”.
Ki bor khmih kila kyntu ia ki trai shnong bad ki nongleit shangkai sha ka thain ba kin pyntip lada don kino kino ki jingtip kiba lah ban iarap ha ka jingwad ia kine ki shikurim.
