Nongstoiñ, K’lyngkot 17: Katba nang mih ki sngi ki khlaw ki btap ha West Khasi hills ki la nang lut namar da ki phew tylli ki trok heh kiba kit rnga, kila їaid sahuh khlem pyrwa ei ei hapoh ka District.
Kitei ki trok kit rnga kim ju їaid ha surok bah ha ka por mynsngi, hynrei ynda ki la dep ban thep rnga ki ju їeng harud surok haduh ban da dum bad ha ka por mynmiet, ki sa їaid bad pynpoi sha Byrnihat ban leit buh їa u rnga ha ki karkhana saiñ nar kiba don ha katei ka jaka.
Ïa ka jingїeng laiñ jong ki trok kit rnga la lap mynta ka sngi ha khmat ka shnong Steplanglur hynrei haba peit ha kitei ki trok ym don briew satia.
Ha kaba їadei bad ka jingjur jong ka jingthang rnga, ym lah ban len ba ka daw kaba kongsan ka dei na ka jingbym ler trei kam jong ka sorkar bad ka tnad ba peit їa ki khlaw ki btap. Lane ka lah ban dei ba ki nongtrei ka tnad khlaw ki їa donkti lang bad ki nongkhaїi rnga lymda kumta kumno ki trok kit rnga ki jyllei haduh katne.
Haba phai ha ka jingtrei kam jong ka tnad khlaw hapoh ka jylla, ka don ka jingїapher kaba jur hapdeng ka aiñ khlaw ha Garo Hills bad Khasi Hills. Namar lada peit ha Garo Hills, wat їa ki dieng kiba la їap rynїeng sa ban kyllon noh ruh, ym don ba nud ban leit khet ne pom їa ki namar ka jingpyrkhing ka aiñ khlaw bad ki nongtrei jong ka forest ruh, ki trei hok bad kim ju ailad їa ki paitbah ba kin pom klumar їa ki dieng.
Haba kaba їadei bad ka jingthang rnga, ki paitbah ba bun ba lang ki ju ong ba ka dei na ka daw jong ka jingkyrduh bylla. Hynrei katei ka jing ong ka dei bym lah ban pdiang, namar lada ki nongshong shnong ki dei kiba smat ba sting bad kiba trei shitom, ki don shibun bah ki lad ban trei ban ktah bad ban trei bylla ha kiba bun ki jait kam.
Wat la kiba bun ba lang ki ong ba ym don bylla hynrei lada wad briew ban phah trei bylla pat ka shem jingeh haduh katta katta ban їoh nongbylla. Haba wad nongbylla ruh kiba bun ki pan їa ka bai bylla sngi ha ka dor kaba rem, katba ka por ban trei bad ka rukom trei kam їahap satia kumta kiba bun ki nongai bylla ki shem jingeh.
