Shillong, Naitung 17 : U Nongmihkhmat ka Hynniewtrep National Liberation Council (HNLC) Bah Sadon K Blah ha ka sngi Nyngkong ula ong ba ka jingiakren iasuk hapdeng ka Sorkar bad ka HNLC kala iaid ha ka lynti kaba dei.
Haba iakren bad ki nongthoh khubor, u bah Sadon ula ong “Haba iadei bad ka jingiakren iasuk ka Sorkar Pdeng, Sorkar Jylla bad HNLC, ngi la sdang ha u bnai Jylliew jong u snem bala lah. Kala iaid la shisnem mynta hynrei ki kam kila nang iaid ha ka lynti kaba dei bad kam don satia kano kano kaba iaid kynriang”.
Ula pyntip ba ka Sorkar Pdeng, Sorkar Jylla bad ki Dkhot ka HNLC kila shong jingialang la bun sien. Kat kum ka jingong jong u, kumba 6-7 sien ki jingialang kila long ha kane ka shisnem”.
Ula ong “Kaei ka jingiakren kaba mih, ngim shym la lap ba kan iaid kynriang lait noh tang ki kam technical bad ngin sa pynbeit ia ki kawei hadien kawei pat. Shisien baka jingiakren iasuk ba pura kala sdang, kam don lynti shuh ban phai dien”.
“Ka jingdawa map noh ruh kala mih hadien ka jingialang bad ka Home Ministry lem bad artylli ki Sorkar. Ki dang iashong bishar halor kane bad katba ngim pat ioh jingpynshai, ngim pat lah ban kynthoh eiei nalor kane” ula ong.
 Bah Sadon K Blah ha ka sngi Nyngkong ula ong ba ka jingiakren iasuk hapdeng ka Sorkar bad ka HNLC kala iaid ha ka lynti kaba dei.){kind=link}