Shillong, Iaiong 04: U Myntri uba khmih ia ka kam jngohkai Bah Paul Lyngdoh hynne ka sngi Hatmajai, ula leit jurip ia ka thaiñ Police Bazaar ban pynthikna ban yn ym shah shuh ia ki kali ba kin iaid lyngba ka surok pdeng kaba pyniasoh na Khyndailad sha Umsohsun.
U Bah Paul ula ong, ba katei ka jingleit jurip kadei kaba la pynlong hadien ba ula dep ban lum iaka jingialang bad ki heh ophisar sorkar na ki tnad sorkar bapher kynthup ia ki heh pulit ka jylla.
“Ngi kwah ban pynthikna ba kane ka bynta jong ka sor kan long thik tang na ka bynta ki nongiaid namar ka sor baroh kawei kala dap sa tang da ki kali bad kam don shuh ia ki jaka na ka bynta ki paidbah ba kin iaid. Ban pynurlong ia katei ka jingthmu yn donkam ban iatreilang da baroh ki tnad sorkar. Ki jingeh kiban mih kin bun hynrei ngin ym peit tang ia ki jingeh hynrei ngin peit ruh kumno ban jop ia kitei ki jingeh” ong u Bah Paul Lyngdoh.
Ula ong, ka jingangnud jong ka sorkar ka long ban pytnthikna ba ka Jylla kan don ia ki jaka ba la buh thik tang na ka bynta ki briew ba kin ioh ban iaid kjat.
Haba kylli ba katei ka jaka nalor ba kadei ka iew ka hat kadei ruh ha kajuh ka por ka jaka sah ki briew bad kumno yn leh halor kane, u Bah Paul ula ong, “Ki don bun kiei kiei kiba lah ban leh, hynrei ka ishu long kumne, ka wan shwa ka jingmyntoi jong ka jylla ne jong u 35 lak ne kan wan hashwa ka jingmyntoi jong ki 3 ngut ki briew kumta ngin ia peit shwa iaka jingmyntoi jongno. Haba peit kyllum, kaei ka jingdonkam bad kiei ba ngi dei ban pynjynsur iaki kyndon yn sa pynwandur”.
Pule lang ia kane: Pyn-eh triang ka ACHIK ban iapein ia u Snem ot Kyrteng ka Roster bad ka Winter Capital ha Tura
