Imphal, Risaw 17 : U Myntri Rangbah ka Manipur N Biren Singh ha ka sngi U Blei ula ong ba ka jingai jaka sah ia ki mynder ba wan rung be-ain ka dei ka jingma kaba khraw duh ia ka Jylla bad pynbna ba kan don noh shen da ka jingiaid survey ha man ki thliew Iing ban lap ia kine ki briew ba sah be-ain.
Haba iakren bad ki nongthoh khubor, u Biren Singh ula ong ba ka Sorkar kan sa shim ruh ia ka sienjam pyrshah ia kito ki trai shnong kiba shah ia kine ki nongwei ba kin im kin sah ha ka Iing jong ki da kaba ai bai wai.
Haduh 613 ngut ki briew kila shah kem ha kine ki 4-5 sngi bala leit noh namar ka jingpynkhein ia ki kyndon jong ka Inner Line Permit (ILP), ong u Myntri Rangbah.
Ka ILP ka dei ka syrnot bala ai da ka Sorkar ban shah iarung iamih ia ki briew ha ki jaka bala pyrrkhing tang ha ka por bala buh. Ka ILP kala treikam ha Manipur naduh u snem 2021.
“Ka jingkhynra ba dang shen ia ki nongpynkhein ia ka ILP ka dei kaba la leh hadien ka jingshem ba bun ki briew ba wan rung sha Jylla ryngkat ka ILP hynrei ym shym la lapdien shuh ia ki na ki phone nombor ba kila ai haba wan rung sha Jylla” ong u Biren Singh haba bynrap, ka jingithuh ia ki nongwei kan dei kawei ka jingeh kaba khraw bha.
“Ngin iaid da ka survey man ka longiing ban wad ia kine ki nongwei ba beain. Ngin sa leh ia kaba dei ban leh pyrshah ia ki trai iing kiba ai jaka sah ia kine ki briew ba beain” ula ong.
