Nongpoh, Rymphang 14 : Ka Hynniewtrep Youth Council (HYC) hynne ka sngi kala hiar sha Ri-Bhoi District ban pynlong ia ka rally “Rai Eh Daw Campaign”-ban pynsngewthuh ia ki paidbah ba kin jied ia ki Nongmihkhmat sha ka Iingdorbar Thaw Ain ka Jylla, da ka jingkitkhlieh ym shuh ban ngop ha ki jingpynbiej ha ki tyngka pliah bad kiwei kiwei ki kam sngewbha.
Kane ka Seng kala pynlong ia kane ka rally ha Iew Patharkhmah ha kaba u Nongialam ha hakhlieh duh ka Seng u samla Robertjune Kharjahrim ula pynsngewthuh ia ki paidbah ia ki nongrim kumno ban jied ia ki Nongmihkhmat sha ka Iingdorbar.
Une u Nongialam ka Seng ula kyntu ia ki paidbah ba kin da bishar bha ia ki kyrtong ba kin jied ym ban shu biej ia ka tyngka pliah ba shisnem san snem bad ki jingpynbyrngia kiba la ai sngewbha da ki kyrtong tang ha kane ka por ialap elekshon.
Ula ong ba ka lawei jong ka Jylla bad ki Nongshongshnong ka shong eh ha ka jingjied ia ki Nongmihkhmat ki ban long kita ki nongthaw ain bad ki nongsain dur ia ka jylla lyngba ki policy bapher bapher.
Kiwei pat kiba la kren ki kynthup ia u General Secretary Bah Roy Kupar Synrem, u President ka Ri-Bhoi Bah Hercules Suting bad kiwei kiwei.
Ha kane ka sngi, ka HYC kala sam ruh ia ki kot lyngkdop sha ki paidbah ka Patharkhmah kaba la ai kyrteng “Rai Eh Daw Campaign -2023 ” Jied Da Ka Jing Kitkhlieh ” ia ki nongmihkhmat paidbah ha ka 27 Rymphang 2023.
