Kular ki paid Selsella bad Chokpot ban kyrshan tyngeh iaka NPP
Tura, Rymphang 13 : U Myntri Rangbah ka Jylla bad National President ka National People’s Party (NPP) Conrad K Sangma, hynne ka sngi nyngkong, ula sdang biang ia ka kylla kaba –ar jong ka jingleit ialap elekshon bad pyndonkam da ka helicopter ban rung sha ki constituency ba sha kyndong jong ka Ri-lum Garo.
Hynne ka sngi, u Conrad ula pynlong iaka jingialap elekshon ha Narangbari kaba hap hapoh ka 48-Selsella Constituency bad ha Chokpot kaba hap hapoh ka 53-Chokpot Constituency.
U Conrad u dei uba mihkhmat ia ka Selsella Constituency ha u snem 2008 bad u dei ruh u Myntri pla tyngka ba khynnah tam ka Jylla ha katei ka por.
Haba kren ha ka jingialang, ula ong ba ka Selsella ka dei ka constituency kaba u sngewjan bha bad ula kren halor ka jingia dei jong u bad ki paidbah, kaba iaid palat ia ka kam sain pyrthei. “Ki paidbah ka Selsella kila hikai ia nga halor ka kam sain pyrthei, nga la ioh shibun ki jingnang jingtip ha ka kam sain pyrthei nangne” ula ong haba bynrap ba u dang iai bteng ban pynlut kham bun ia ka por sha ki paidbah bad ki jingeh jong ka Selsella.
Haba kren ia ka mat ba pynieid ia baroh kiba wan iashimbynta, ula ong “Ka Elekshon ka wan bad ka leit, ki jingeh ki wan bad ki leit hynrei tang kawei kaba iai neh ka dei ka jingiadei. Ngi baroh la kha ha Ri-lum Garo, Ngi la sah ha Ri-lum Garo bad ngin pynkut ia ka jingim jong ngi ha Ri-lum Garo, ta ka daw ngi donkam ban iadonlang”.
U Conrad ula pynpaw ruh ba kum u Myntri Rangbah ula pynthikna ba u shim ia ki jingai jingmut jong baroh ki briew na ki niam bapher bapher, ne ki jaidbynriew. “Nga kular ha phi ban gam ju ibein iano iano ruh ha ka kam ba nga trei. Nga burom ia baroh bad nga khein kumjuh ia baroh” ula ong.
Haba pynpaw ba u Arbinstone Marak u dei u Khun ka Ri-lum Garo bad ba ki paidbah ki dei ban iatylli ha kaban vote ia u, ula ong “U dei na Selsella bad u tip ia ki jingeh jong ka thain bad u dei uba biang eh ban mihkhmat ha kaban pynsngew ia ka sur jong ki paidbah”.
U Conrad ula ong ruh ba ula jied ia u Arbinstone Marak ha ka jaka ka MLA namar ba ki paidbah kila tyrwa ia u bad pynpaw ba kin ai ka jingkyrshan kaba khlain bha.
Haba pynpaw ba ka NPP kala pynkhreh ban thaw biang ia ka Sorkar ban wan, ula iasaid ba kam don jingmut ban vote ia ki kyrtong jong kiwei ki party ki ban nym thaw ia ka Sorkar. “Ka sain hima sima ha Meghalaya kala iapher bha mynta. Ki paidbah ka Ri-lum Khasi bad Jaintia kila iatylli ban pynkhlain ia ka NPP bad ngi sngewskhem ban jop bun duh na baroh” ula ong.
Ha Chokpot, une u Khliehduh ka NPP ula kren sani bha halor ki kampynroi bapher bapher bala wanrah da ka Sorkar ka NPP ban pynthikna ia ka jingkiew shaphrang jong ka South Garo Hills, kaba la shah iehbein da ki phew snem haba kyntu ruh ia ki paidbah ba kin vote ia u kyrtong ka NPP u Sengchim Sangma.
Ula ong ba ka jinglong jingman ka surok sha Chokpot ka long kaba sniew bha hynrei ka Sorkar ba ialam da ka NPP kala pynthikna ba ka jingshna ia kane ka surok ka long kaba kongsan naduh na 9th mile jong ka surok Tura-Dalu haduh ha Chokpot.
Ula ong ruh ba ka Sorkar ba ialam da ka NPP kala shim ia ka sienjam ban shna ia ka Ophis jong ka Block bad ka Civil Sub Division. Ula ong ruh ba ka Sorkar kala dep mang jan T.100 klur ban pyntrei ia ki kam pynroi bapher bapher ha ka thain Chokpot.
