Shillong, Rymphang 27: U chief electoral officer (CEO) ka jylla u bah F.R Khanrkongor ula iathuh ba ka jingthep Vote ha ki 6 tylli ki Polling Station jong ka Block-II, kiba hap hapoh ka Mawhati konstitwensi Ri-bhoi District ki iaid beit iaid ryntih namar ka jingiatreilang hapdeng ka sorkar Meghalaya bad Assam.
U bah Kharkongor ula iathuh ba naka liang ka tnat Election Commission of India (ECI) kala shimkkhia hadien bala ioh khubor ba uwei u MLA napoh ka jylla Assam ula byrngem ban pyndik iaki nong Meghalaya kiba sah ha ki thain khappud lada ki mut leit thep Vote.
“Naka liang ka ophis CEO bad ka sorkar Meghalaya kala shim khia bad naka liang ka Chief Election Commissioner (CEC) ruh haka 13 tarik mynta u bnai kala kular ba baroh kiba don kyrteng ban thep Vote ha ki 6 tylli ki Polling Station kiba hap ha Mawhati konstitwensi kidei ban ioh iaka hok ban thep Vote” la ong u bah Kharkongor.
U bah Kharkongor ula iathuh ba naka liang u chief secretary (CS) ka Meghalaya ula iakren bad u CS ka Assam bad naka liang ki bor district naduh ki deputy commissioner (DC) bad ki Director General of Police (DGP) jong baroh artylli ki jylla kila iatreilang ban pynthikna ba ki nongthep Vote kiba don palat 2000 ngut ki ioh ka hok ban leit thep Vote.
“Haduh mynta kam shym la don kano kano ka jingshah pyndik iaki nongthep Vote ha ki 6 tylli ki Polling Station kiba hap ha Mawhati konstitwensi bad naka liang ka tnat pyniaid ilekshon ka ai khublei iaka sorkar Assam kaba la iatreilang naka bynta ban wanrah ka jingshngain iaki nongthep Vote kiba don ha ki thain khappud Meghalaya-Assam” la ong u bah Kharkongor.
