Shillong, Lber 27 : U Myntri ka tnad bording Abu Taher Mondal ha ka sngi Palei ula iathuh ba ka Tnad ka la peit pyrman bha bad shim ruh ia ki sienjam ba donkam ban pynthikna ha kaban lah pynneh ia ka jingshngain jong ka Dam Umiam.
Haba iakren bad ki nongthoh khubor, u Mondal ula ong ba ka Tnad Bording bad ka MeECL ki kham sngewkhia eh halor ka jinglong jingman jong ka Dam.
Kat kum ka jingong jong u, ki jingsngewkhia kila kham duna mynta hadien bala dep ban pyntrei ia ka Dam Rehabilitation and Improvement Project (DRIP).
“Ngi la pyrkhing ia ka jingiaid ki kali ba khia haba buh hakhmat ia ka jingshngain jong ka Dam. Ngi la peit pyrman bha ia kane. Ki briew jong ngi kila don hangte bad ngi la buh ruh ia ki Pulit khnang ba ngin lah pynneh ia ka jingshngain jong ka Dam” ula ong.
Haba pynpaw ba ka rta jong ka Dam ka dei ka mat kaba sngewkhia, u Myntri ula ong “Mynta ka jingkylli ka long ba kaei ka ban jia hadien habud hadien bala kut noh ka rta jong ka dam. Kane ka dei ka kam kaba eh bha namar ka Dam Umiam ka ai um sha ki 216 Megawatt jong ki saw unit ka Umiam bad ruh ka Umtru Power Project ba thymmai hajan Byrnihat.
“Baroh ka um ka wan na ka pung Umiam. Ka dei ka kam kaba sngewkhia bha. Ngi la iakren ia kane hynrei ia mynta ngim pat shim ia kano kano ka rai. Ngi kyrmen ba kan sa don biang ka jingiakren bad jingiasyllok halor kaei ka ban long hynrei ka technology ka dei kaba kylla sted bha, kumta kin sa don ki technology kaba lah ban pynjlan ia ka rta jongka dam hynrei watla katta, ngi don ia ka jingsngewkhia” ula pynpaw.
Ha kajuh ka por, u Mondal u pyntip ba ka Sorkar kala bynshet ha ka National Highways & Infrastructure Development Corporation Limited (NHIDCL) ba kan pynkhreh ia ka Detailed Project Report (DPR) na ka bynta ban shna ia kawei pat ka surok ban pyniaid kali.
“Nga tharai ki kam kila iaid bad ngin sa ioh ia ka surok bypass bad ka long kaba donkam bha ruh namar ka jingkieng ka dei kaba la tei bad plie naduh u snem 1965. Bad ha katei ka por, u pud bala buh ia ki kali kit jingkit ka long kaba duna bha bad kumta la pynwandur ia ka jingkieng. Mynta ki kali kila kit khia bha ia ka jingkit bad ngi la donkam ia kawei pat ka jingkieng ka ban lad kyrda ia kane” ula bynrap.
