Shillong, Nohprah 30: Ki nongrep ka jylla Meghalaya kila mad ia ka jingeh bad jingjynjar haba ki shah ot kilo ki marrep ki jongki haba ki leit rah sha ki iew ki hat.
U Bah K. Kurbah, u nongrep na East Khasi Hills, ula pynapw shaphang a jingshem jingeh ka jongu bad ula ong, “Haba ngi leit rah ia ki marrep sha ki iew ki hat, la khate noh shi Kg na ka 10 Kg kaba ngi rah. Lada ngi rah 100 Kg ngi shah khate noh 10 Kg, kaba iaryngkat bad shi byrni u khaw. Kane kadei ka jingduhnong kaba khraw ia ngi ki nongrep”.
U Bah Kurbah ula kyntu ia ka sorkar ban pyrkhing ia ki dor jong ki marrep kiba wanrah na ki jaka rep sha ki iew ki hat.
“Ngi kyntu ia ka sorkar ban buh noh da ka dor naka bynta ki marrep kiba ngi pynmih khnang ba ngin ym mad ia ka jingduhnong. Ngim shym la pan eh shibun, hynrei tang ia ka dor kaba biang naka bynta ka jingtrei shitom ka jong ngi”.
Kane ka mat jong ka jingshah ot kilo jong ki marrep kadei kaba la neh slem bha ha ka jylla Meghalaya. Watla kala don ka jingai la bunsien ia ki jingkular na ka sorkar ban thaw ia ka committee ban buh ia ka dor ka mur jong ki marrep, hynrei kane ka mat kadei kaba ym shim la lah ban pynbeit haduh mynta.
“Ngi la ioh ia ka jingpynthikna la bun phew sien ba yn sa thaw ia ka committee ban pynthikna ba ki nongkhaii bad ki nongrep kin ym mad jingeh ne ban shah khniot ka dor jong ki marrep. Hynrei ym shim la leh eiei pat haduh mynta” ong u Bah Kurbah.
Ka sorkar Meghalaya kala kular ban thaw ia ka committee katkum ki kyndon jong ka ain ban shimkhia ia katei ka mat, hynrei ym shim la thung ia ka committee kaba la pynlong ia ki nongrep kiba kum u Bah Kurbah ban bteng ban mad ia ka jingduhnong.
“Ka pork ala dei ba ka sorkar kan shim noh da ki sienjam ban shimkhia ia ki jingud jingnam ki jong ngi.Ngim shym la pan ia ka subsidy hynrei tang ia ka dor kaba biang naka bynta ki marrep ki jong ngi. Ngi kyntu ia ka sorkar ban iatreilang bad ngi ban wad ia ki lad ki lynti ban pynbeit noh ia katei ka jingeh” ong u Bah Kurbah.
Namar ka jingbym lah ban pynbeit ia katei ka kynrum kynram, kumta ki nongrep ha ka jylla ki iai bteng ban mad ia ka jingduhnong bad kane kala ktah jur iaka iing ka sem ka jongki bad wat ia ka ioh ka kot ha ka liang jongka rep ka riang.
