Shillong, Jymmang 29 : Ka Sorkar Jylla ka dang iai ap ia ka jubab jong ka seng Hynniewtrep National Liberation Council (HNLC) ban pynbteng biang ia ka jingiakren iasuk.
U Chief Secretary ka Jylla Bah DP Wahlang ha ka sngi Balang ula ong “Ka Sorkar kam pat ju ong ba sangeh noh ia ka jingia kren iasuk naduh kaba sdang. Ngin kwah eh ia ka jingsuk. Ngi la kyrpad ia ka seng ba kan wan shakhmat bad pynbteng biang ban iakren na kaei kaba la sangeh bad ngi dang ap ia ka jubab na ki”.
“Ngi la shimkhia bha bad ngi kwah ban iaid ha ka lynti jong ka jingsuk” ong u Bah Wahlang haba jubab ia ka jingkylli la ka Sorkar kan iai bteng ban iakren iasuk hadien ka hukum ba dang shen jong ka UAPA Tribunal ban pynksan ia ka rai jong ka MHA ban pynbna ia ka HNLC kum ka seng beain sa san snem.
Halor ka jigndawa ka HNLC ban map noh ia ki kam bymman hashuwa ban pyniaid shakhmat ia ka jingiakren iasuk, u Chief Secretary ula ong “Kane kein ka dei ka mat kaba ngi donkam ban iakren ynda ngi la iashong ha ka miej iakren hynrei lada kim wan sha ka jingiakren, kumno ngin lah ban shim ia kano kano ka rai khlem ka jingiakren bad ngi kyntu ia ki ba kin wan shakhmat bad to ngin iakren bad shim lang ia ka rai”.
Haka 3 tarik Kyllalyngkot, 2024, ka HNLC kala pynbna ia ka rai ban weng noh ialade na ka jingiakren iasuk kum ka dak ban pyrshah ia ka jingkynnoh bym shimkhia jong ka Sorkar ha ka ban leh eiei ia ki mat jingdawa ba hakhmat eh ka seng ba kynthup ia ka jingmap noh ia ki kam bymman bala dep bad ban weng noh ia ka jingkhein beain.
Haba kylli halor ki jingkynnoh dawa pisa jong ka seng, u Bah Wahlang ula ong “Ki briew kila ioh pdiang ia ki shithi dawa pisa, kane ka dei ka jingpynksan ia ka jingkhein beain ia ka seng. Phi la jubab ia ka jingkylli kaba phi hi phi la kylli dang khyndiat minit ba lehse ka dei ka daw balei ka Tribunal kala khein beain ia ka”.
 ban pynbteng biang ia ka jingiakren iasuk.){kind=link}