Guwahati, Risaw 28 :Da kaba nang aiding halor ki kynrum kynram kiba iadei bad ka Miya museum, na ka liang u MLA barim ka Congress u Sherman Ali ula ong ba ka jingshah kem ki dkhot jong ka Miya Parishad ka dei ban long u Nelson Mandela ka Africa.
Da kaba pynksan halor kane ka jingkren, une u dkhot barim ka congress ula ong ba ki nongialam jong ka kynhun bynriew Miya Parishad kiba la shah kem ki dei ban long kiba jai jai kumba long u nongialam ka thain Africa u Nelson Mandela da kaba shong phatok haduh 27 snem kynthih katba u dang bteng ia ka jingialeh ka jong u pyrshah ia ka jingbanbor jong ki dohlieh napoh ka phatok kaba u shong.
Haba kren sha ka lad pathai khubor, u Sherman ula ong; “Watla ha ki rukom pyrkhat kam Nga don shibun ki jingiapher jingmut bad ka Miya Parishad..hynrei watla katta nga pynrem jur halor kane ka jingshah kem jong ki nongialam jong ka Miya Parishad tang namar ka jingtei ia ka Miya museum.Nga ngeit ba kane ka jingjia kaban sahkynmaw hapdeng ki jaidbynriew Miya ka lam ruh sha ka jingithuh ia kane ka kynhun bynriew.Kine ki nongialam kiba la shah kem kila shah lehbor,” ong u Ali.
U Sherman ula kam ruh ba u Myntri Rangbah (CM) ka Assam u Himanta Biswa Sarma u don ia ki jingthmu kiba shalyndet halor kane ka jingkurup noh ia ka Miya museum bad halor ka jingkem ia ki nongialam jong ka Parishad.
Nalor kata ula ong ruh ba u Himanta Biswa Sarma u don artylli ki jingthmu kiba shalyndet, kawei ban pynphriang ia ka jingsyier hapdeng ki nongshong shnong kiba dei na ka kynhun bynriew Miya khnang ba kin ym shlan ban mih shakhmat.Kaba ar ka long ban pynkhlain iala ka vote bank.Ka jingthmu ka jong u ka long ban shim ia ki sienjam ba tyngeh pyrshah ia ki nongshong shnong kiba dei na ka jaitbynriew Miya, ban leh kiar na ki bad ban wanrah ka jingsyier hapdeng kine ki nongshong shnong.
Da kaba pynshai halor ka nongrim khlem da pynpaw ka jingkyrshan na ka bynta ka Miya Parishad hynrei ba ka jingkwah ka jong u ka long tang ban pynshlur ia kine ki briew kiba la shah kem, u Sherman Ali ula ong shuh shuh; “Dei na kata ka daw ba ki arngut ki briew kiba la shah kem kila shah banbor tyngeh ha ki pulit. Nga kwah ban pynshlur ia ki da kaba ong, ko hymmen para wat khuslai, long kiba iaishah.Kano kano ka lynti kaba phi jied na ka bynta ban tei ia ka musuem kaba ngam don ka jingsngewkhia. Hynrei, nga ngeit halor ka jingithuh ia ki nongshong shnong jong ki jaidbynriew Miya bad ka jingiada ia ka kolshor bad ki riti dustur ki jong ka.
Kumta ruh Nga pynkynmaw ia kine ki para ki hymmen kiba la shah kem ba ki dohiong kila iakhun haduh 400 snem, bad u Nelson Mandela ula shong phatok haduh 27 snem ban iakhun halor ka jingshah banbein, kumta ma ki ruh ki dei ban long kiba iai shah ha ka jingialeh ka jong ki ka ban sa pynsah histori na ka bynta ki jaidbynriew Miya hapoh ka jylla Assam.
