Nongstoiñ, Risaw 2: Ka jingsumar їa ki longkmie ba armet bad ka jingpynsgewthuh їa ki lad jingїarap ba ka sorkar ka la mang kyrpang ha ki ka long kaba donkam haduh katta katta, ong u Dr R.Laloo.
U Dr Laloo ula pyntip ruh ba haduh hynniew ngut ki Longkmie ba armet kila khlad ha kine ki hynniew bnai bala lah ha West Khasi Hills District.
Une u Doktor ula ai jingkren ha Langpih myn ha ka sngi thohdieng jong ka taїew ba la dep, kaba dei ka sngi kyrpang na ka bynta ban sumar їa u klongsnam.
“Naduh u bnai Ïaїong jong une u snem haduh mynta, hynñiew ngut ki longkmie kiba armet kiba dei napoh West Khasi Hills, ki la khlad noh bad lai ngut na ki, ki dei na ki shnong kiba don ha ka thaiñ Langpih” ula pyntip.
Haba batai shuh shuh halor katei ka jingjia ba sngewsih, u la ong ba ka daw ka lah ban dei namar ba kim tip їa ki lad jingїarap ba ka sorkar ka la mang kyrpang na ka bynta jong ki. Ka dei ruh na ka jingbym shimkhia jong ki rangbah kiba tip bha shaphang ki lad jingїarap kiba ka sorkar ka la mang kyrpang na ka bynta jong ki longkmie ha ka por ba ki armet.
Ha kajuh ka por u la ong ba ki don shibun ki longkmie ha shuwa ba kan poi ka por ban kha, ki ju khot їa ki nongsumar kiba don ha ki shnong jong ki bad ha ka por ba kha ruh ki ju shaniah beit ha ki nongpynkha khun. Hynrei ki don pat ki nongpynkha khun ki bym shym pat la їoh їa ka jingpynbit na ki Doktor sorkar, kumta ka long kaba ma ban shaniah ha kiba kum kitei ki nongpynkha khun.
“Ki don pat ki nongpynkha khun kiba la їoh їa ka jingpyntbit na ki Doktor bad kiba ka sorkar ka la ithuh їa ki kum ki nongpynkha khun, hynrei ka jingwan kha ha ki Hospital ka long kaba kham donkam bad kaba myntoi shibun na ka bynta jong ki” ula ong.
U Dr. Laloo u la pynkynmaw ruh ba ka jaitbynriew Khasi Jaiñtia bad Garo ka dei ka jaitbynriew kaba ai jait ha ka kynthei bad lada jia ba ka longkmie ka khlad noh shiteng por, ka long ka jingduh kaba khraw ym tang їa ki khun ki kti hynrei їa ka shnong ka thaw bad ka jaitbynriew baroh kawei.
U la ong ruh ba ka por ka la dei eh ba ki rangbah, ki nongsynshar shnong, ki nonghikai skul bad ki samla pule bad ki khynnah skul ba kin don ka jingїatreilang kaba jan eh bad ki Doktor, ki Nurse, ki ANMs bad ban pynshai ha baroh ki longkmie ha ki shnong ki thaw, ba haba ki armet ki la dei ban leit phah peit ne sumar ha ki Doktor, khnang ba ki Doktor kin ai jingmut їa ki kumno kin leh haduh ban da dei ka por ban kha їa I khunlung.
U la ong ba ka thong jong ki Doktor bad ki nongtrei hapoh ka tnad ka koit ka khiah ka West Khasi Hills, ki la buh mynta їa ka thong ba la kumno kumno kumba 75% na ki longkmie ba armet napoh ka District, kin dei ban wan sha ki Hospital haba ka por ban kha khunlung ka la jan bad kim dei ban sngew artatien ei ei, namar ka sorkar kan pynbiang lut їa ki jingdonkam baroh.
