Shillong, Jymmang 17 : U Myntri Rangbah ka Jylla Conrad K Sangma hynne ka sngi Balang ula pyntip ba ka Kynhun Myntri kala hun ia ki jingbatai (Presentation) kaba iadei bad ka Roster System.
“Ka jingbatai kaba bniah la wanrah hapoh ka Kynhun Myntri hynne ka sngi bad hadien bala iakhmih ia kane ka jingbatai, ka Kynhun Myntri kala hun ia kiei kiei baroh bad kila don katto katne ki jingpynshai bala ai bad hadien baroh kila iamynjur ha ban pyniaid noh shakhmat ia ka kam” ong u Conrad haba iakren bad ki nongthoh khubor hadien ba pyniaid ia ka jingialang.
Ula pyntip ba ia kane ka juh ka jingbatai yn sa rah sha ka jingialang jong ka MDA ka ban long lashai ka sngi bad kumjuh ruh sha baroh ki seng sain pyrthei ka ban long ha ka 19 tarik Jymmang.
“Hadien ba ngi la dep pyni bad aiktien sha baroh ki kynhun na kylleng ka Jylla, ngin sa khot ia ka jingialang bad ki kynhun bapher bapheer ba kynthup ki Sengbhalang, ki seng niam bad kiwei kiwei. Kane kan dei ka jingialang kaba saw ka ban sa long hadien shitaiew lane hapoh 10 sngi” ula ong.
Haba kylli kumno ka Sorkar ka thmu ban pyntreikam ia ka Roster System, u Myntri Rangbah ula ong “Ngam pat lah ban ai ia ki jingtp ba bniah ia phi namar ngi hap ban ai jingbatai shuwa ia baroh hynrei kumba nga ong, ka Roster bad ka jingthung kam ka dei ka kam kaba iai bteng bad hadien bala iohi lut ia baroh ki jingtip ba kumno ka roster kan treikam bad kumno ka rukom treikam kan iaid lashai lashisngi bad kumno ka jingthungkam kala iaid ha ki snem bala leit noh, la wanrah ia kane ka jingbatai”.
“Baroh ki Myntri Sorkar kila hun hadien ba ki iohi ia kane ka jingbatai (presentation). Ia kane ka jingbatai la pynshong nongrim ha baroh ki jingshisha bad ki jingkhein jingdiah haba khmih ia ka reservation policy bad haba khmih ia ka jyrwit jyrwat jong ka roster system” ula ong haba bynrap ba kiei kiei baroh kin sa shai kdar hadien ka jingialang jong baroh ki seng sain pyrthei.
Haba pynpaw ba ka jingkylli kam mih satia halor ka jingtreikam ia ka roster naduh ki snem bala leit noh ne nangne shakhmat, u Myntri Rangbah ula ong baka Roster System bad ka jingthungkam ka dei ka kam ki ban bteng bad iaid beit shakhmat.
“Ka dei ka kam ba hap bteng bad pyniaid beit bad kumta kan iaid beit shakhmat. Hadien ba ngi la dep ai ia ki jingbatai, nga thikna ban sa sngewthuh shai bad haba pynshong nongrim ia kane, ngin sa jam shakhmat”.
Halor ka rai jong ka VPP ban pynjur ia ka jingiakhih lada ka Sorkar kam pat lah ban shong bishar thymmai ia ka Reservation Policy, u Conrad ula ong “Ngi khlem pat iakren ia ka reservation policy bad kane ka dei ka kam ba khlem don satia ha ka mat iakren. Ia mynta, ngi la iakren tang halor ka roster system bad ngin kren beit tang ia kane”
Ha kajuh ka por, u Myntri Rangbah ula pyntip ba hadien b aka roster system kala biang nadong hadong, ka jingthungkam kan sa iaid shakhmat bad kam don jingeh satia ia kane.
Ula pynpaw ia kane haba jubab halor ka jingkylli ba iadei bad ki samla kiba la kut ka rta ban thep kam Sorkar namar ka jingslem ban pyntreikam ia ka roster system hapoh ka Jylla.
