Shillong, Jylliew 12: Ha ka jingleit jurip ba syndet syndet ban bishar ïa ki jingtei (Infrastructure) jong ki kam ïalehkai ha South West Garo Hills, u Myntri ka tnat Sport u Bah Shakliar Warjri u la hiar ban jurip ïa ka Nagrasket Football Turf bad ka International Stadium kaba dang don hapdeng ka jingpyntrei ha Ampati.
Ka jingwan jngleit jurip jong u Myntri ka pyni ïa ka jingangnud jong ka Sorkar ban pynbha ïa ki jaka ïalehkai ha kylleng ka Jylla Meghalaya, khamtam ha ki thaiñ nongkyndong jong baroh ki district ka Jylla.
Ha kane ka jingleit jurip hapoh ka thaiñ South West Garo Hills, la synran lang da u Dolrich B G Momin u Additional Deputy Commissioner ka South West Garo Hills, u District Sports Officer Saljagring M Marak, SSCM Assistant Engineer bad ki heh ophisar.
Ha kane ka jingleit jurip ïa ka madan Nagrasket Football Turf, u Myntri ka tnat Sport u la shim khia ïa ka jingsniew jong ka madan ïalehkai kaba dei ruh ka Artificial Turf bad u la bthah ïa u Engineer ka SSCM ban sdang noh mardor ïa ki kam ban maramot.
U Bah Shakliar u la bthah ba ïa ka jingmaramot iaka madan dei ban aiti noh kloi sha ka District Sports Office bad shaka Football Association Ampati ban pynïaid bha bad ban ioh pyndonkam ki paidbah.
Ha ka jingjurip iaka International Stadium, u Myntri ka tnat Sport u la pynpaw ia ka jingbym sngewhun namar ka jingsuki ki kam ban pyntrei bad pynbha.
U la bthah ia ka SSCM ban bishar bniah ia ki kam shna kiba dang sah mynta bad ban pynthikna ba ia ki kam kiba dang sah dei pyndep hapoh ka jingpeit bniah kaba pyrkhing khnang ban pyndep noh haka por ba la buh.
U Myntri u la ban jur ia ka jingdonkam ban pynneh ia ka jinglong ha ki jingtei ialehkai ban pynroi ia ki sap kiba don ha ka thain bad ban kyntiew ia ka kolshor ialehkai ha ka thain.
 jong ki kam ïalehkai ha South West Garo Hills, u Myntri ka tnat Sport u Bah Shakliar Warjri u la hiar ban jurip ïa ka Nagrasket Football Turf bad ka International Stadium kaba dang don hapdeng ka jingpyntrei ha Ampati.){kind=link}