Pynpra biang ki bor District sa 3 tylli ki karkhana ha Shallang
Shillong, Naitung 10 : U Deputy Commissioner ka West Khasi Hills Bah Garod LSN Dykes, ula hukum ban pynpra lut ia kumba 57 tylli ki karkhana coke ba treikam be-ain ha ka thain Shallang West Khasi Hills District.
Hynrei ula ong ba napdeng kine ki 57 tylli, 14 tylli ki dei kiba la ioh ia ka Single Window clearance tangba kim pat don satia ia ka jingai jingbit ba kin treikam.
Haduh mynta, ki bor District kila dep ban pynpra haduh 4 tylli ki karkhana ba be-ain, ba kynthup ia lai tylli kiba dang shu pynpra hynne ka sngi Nyngkong, da kaba shu pynbthei ia ki chimney ba sain ia u coke.
Haba iakren bad Ka Shlem, u Deputy Commissioner ula pyntip ba kane ka jingpynpra ia ki karkhana coke ba beain kala sdang naduh ka 7 tarik Naitung.
Ula iathuh ba kat kum ka hukum ba pynmih naduh u bnai Nohprah 2022, ki don haduh 57 tylli ki karkhana coke ba treikam beain ha ka thain Shallang hynrei napdeng kine, 14 tylli ki dei kiba la don ia ka Single Window Clearance tangba kim pat don satia ia ka concent to operate ne ka jingbit ba kin treikam.
Haba kylli katno tylli ki karkhana ki ban shah pynpra, u Deputy Commissioner ula ong “Kata kein nga ong ki don 57 tylli kiba la shem ba ki treikam be-ain hynrei 14 tylli ki dei kiba don ia ka Single Window Clearance. Mynta ngin hap shim shuwa ia ki jingai jingmut na ka Tnad Industries bad ki nongiasaid ain jong ngi shuwa ban shim ia kano kano ka lynti (ban pynpra). Kin hap pyni ruh ia ki kot ki sla kiba donkam baroh”.
Kat kum ka jingong jong u, kine baroh 57 tylli ki karkhana ki dei kiba la khang khyrdep naduh u bnai Nohprah 2022.
Haba kylli halor ki karkhana ba pynpra hynne ka sngi Nyngkong, u Deputy Commissioner ula ong ba ka kynhun na ka Ophis kila don sha Shallang ban pynpra ia ki karkhana ba beain hynrei namar ka jingthut ka mobile network, haduh mynta um pat ioh satia ia ka kaiphod.
Na ki tyllong khubor ba ioh lum, la iathuh ba haduh 3 tylli ki karkhana kila shah pynpra biang hynne ka sngi ha ki bor District hynrei ym shym la ioh pat ia ki kyrteng jong kine ki karkhana.
Lah ban kdew hangne ba kane ka jingpynpra ia ki karkhana coke kala wan jia ruh hadien ka jingiai tynjuh jong ka Iing Kashari Meghalaya High Court ia ka Sorkar Jylla halor ka jingkuman ban leh eiei pyrshah ia kine ki karkhana bad ruh ia ka kam tih dewiong beain.
Kane kala wan jia ruh hadien ka jingkem ia 5 ngut ki trai jong kine ki karkhana ha kine ki khyndiat taiew bala lah.
Pule lang ia kane: Iakhih ka JSM hakhmat ka JHADC ba leh khyrdop khajna be-ain ka KAAC ha Khanduli
