Tura, Lber 14: Ki bor pyniaid district ka West Garo Hills kila hukum ba dei ban khang khyrdep lut ia baroh ki jaka shna mawit be-ain kiba dei treikam hapoh jong ka district, da kaba pynpaw ia ka jingsngewkhia ia ka jingshah ktah ka mariang bad ia ka koit ka khiah.
U District Magistrate u Vibhor Aggarwal ula pynmih ia ka jingmaham hapoh jongka Section 163 jongka Bharatiya Nagarik Suraksha Sanhita (BNSS), 2023, ha kaba la bthah ia baroh kiba shna mawit khlem ka jingioh jingbit kidei ban sangeh treikam noh mardor.
Kane ka hukum kadei da kaba bud ryntih ia ki jingbthah jong ka National Green Tribunal (NGT), kaba la shah pynkup bor ban leh da kaba tyngeh pyrshah ia ki karkhana shna mawit kiba treikam khlem ka jingioh jingbit.
Katkum ka jingpynpaw ki bor district, bun ki jaka shna mawit ha West Garo Hills la shem ba kidei ki bym shim la ioh ia ka jingbit ha kaba iadei bad ka Environmental Clearance, kaba la pynmih ia ka jingsngewkhia shaphang ka jingpynjaboh ia ka lyer, ka jingshngain ka rukom treikam bad ka koit ka khiah jong ki shnong kiba don marjan.
Ki ophisar kila pynpaw ba ka jingtreikam jong kitei ki jaka shna maw block kala noh synniang bha ha ka jingpynjaboh ia ka lyer bad ka jingktah ia ka mariang bad kala buh ruh ha ka jingma ia ki nongtrei bylla bad ia ki nongshong shnong ruh.
“Namar ka jingshah ktah ka mariang bad ka jingbuh jingma ia ka koit ka khiah, u District Magistrate ula pynmih ia ka hukum ha kaba la bthah ba dei ban khang khyrdep lut ia baroh ki jaka shna mawit kiba be-ain kiba don ha kylleng jong ka district,” la pynpaw ki bor pyniaid district.
