Shillong, Iaiong 25 : Ka Tnad Meghalaya Police kala pynmih ia ka hukum ba bthah ia baroh ki nong Pakistan ba ki dei ban mih noh na Meghalaya kaba dei ka Jylla jong ka Ri India.
Kane ka jingbthah kala mih na ki Superintendent of Police ka Ri-Bhoi District V.S Rathore bad Superintendent of Police ka East Khasi Hills Bah Vivek Syiem.
Kat kum ka hukum, kine ki Heh Pulit ula ong ba haba pyntreikam ia ka jingbthah ka Ministry of Home Affairs (MHA) ba 25 tarik Iaiong, baroh ki nong Pakistan lait noh tang kito kiba don ia ka Long Term Visa bad Diplomatic lane Official Visa, la bthah ba kin mih noh na u pud u sam ka India ha lane shuwa ka 27 tarik Iaiong.
Kila ong ba ki nong Pakistan kiba wan da ka Medical Visa la bthah ba kin mih napoh ka Ri ha lane shuwa ka 29 tarik Iaiong bad kito kiba wan da ka SAARC Visa la bthah ba kin mih ha lane shuwa ka 26 tarik Iaiong 2025.
Kila la ong ba ka jingbym kohnguh ia kane ka jingbthah kan pynngat ia kine ki briew ha ki jingpynshitom ba tyngeh kat kum ki kyndon ain kynthup ka jingpynngat ha ki kam bymman.
Kila ong ba kano kano ka jingtip ia ka jingdon ki nong Pakistan lah ban pyntp sha ka Police Control Room (Dial 112).
