Shillong, Naiwieng 24 : U Symbud Myntri Rangbah ka Jylla ba khmih ia ka Tnad kam Pohiing Bah Prestone Tynsong ha ka sngi Nyngkong, ula ong ba ka Sorkar Jylla kala hukum ia ki bor District bad ki Pulit ba kin khang shisyndon ia ki kam tih dewiong beain bad kiwei kiwei ki kam beain hapoh ka Jylla.
Haba iakren bad ki nongthoh khubor, u Bah Prestone ula ong ba ka Sorkar ki leit ki wan hynrei ka kam tih dewiong beain kam dei satia kaba dang thymmai bad ha ka jingshisha kala sdang naduh u snem 2014 ter ter, ka khyllipmat ba ka National Green Tribunal (NGT) kala khang ia ka jingtih dewiong hapoh Meghalaya.
“Da kaba kynnoh ba kane ka Sorkar ba mynta kala phai lyndet ia kane ka kam nga sngew ba kam iahap satia bad kam dei ruh kaba shisha” ula ong haba kynthoh ia ka jingkylli ba iadei bad ka interim report ba 18 jong u (retd) Justice BP Katakey bala aiti dang shen sha ka Iingkashari Meghalaya High Court.
Ula ong ba ki bor ba khmih ia ka ain kila don ban tehlakam ia ka kam tih dewiong beain bad kiwei kiwei ki kam beain hapoh ka Jylla.
“Ngi la pynkhamti naduh ki bor District haduh ki Police Station lane wat ha ki Block ruh. Sngewbha ban peitngor bad sngewbha ban khmih lang ia ki kam beain ym tang ia ka jingtih marpoh khyndew ba kan ym don ha Jylla Meghalaya” ula ong.
