Shillong, Rymphang 03 : Ka Justice BP Katakey Committee kala hukum ban pynlait noh mardor ia ka song pisa na ka bynta ban pynpra ia ki 33 tylli ki karkhana coke ha East Jaintia Hills bad West Jaintia Hills District.
Ka Committee kala hukum ia ki bor District ka EJH bad WKH ba kin pynpra ia ki 16 tylli ki karkhana coke ha EJH bad 17 tylli ki karkhana coke ha WKH, haba pynpaw ba ki lah ban pynmih mar sopsop.
“Ka Committee kala ai jingmut ban pynlait noh mardor ia ka pisa ba donkam sha ki bor District ka EJH bad WKH ba kin pynpra ia kine ki karkhana coke bad ba kin leh ia kane kam mar syn ioh ia ka pisa…khnang ba kan nym don ka jingpynmih mar sop sop” ong u Justice Katakey ha ka 34th Interim report bala aiti sha ka Iingkashari Meghalaya High Court.
“Ki Deputy Commissioner bad Superintendent of Police jong kine ki District ki dei ban pynthikna ba kine ki karkhana kim dei ban treikam shuh tad haduh ban da dep pynpra” kala ong.
Ka Committee kala hukum ruh ia u Deputy Commissoner ka EJH ba un pynpra ia ki 16 tylli ki karkhana coke hapoh ka artaiew ba ioh pdiang ia ka pisa bad ban aiti ia ka kaiphod.
La bthah ia ka DMR, Meghalaya, Shillong ba kan ai mardor ia ka pisa ba donkam na ka bynta ban pynpra ia kine ki karkhana.
Kane ka sienjam ka long kat kum ka hukum ka Iingkashari Supreme Court ba 25 tarik Naiwieng, 2024, ha ka Writ Petition (Civil) No. 720/2023 [Druk Fuel Limited -Vs- The State of Meghalaya and Others].
Kat kum ka kaiphod, lah khein antad ba donkam ia ka pisa ba T.42,50,000 ban pynpra ia ki 17 tylli ki karkhana coke ha West Khasi Hills.
