Shillong, Nailar 27 : Ka Iingkashari u NA Khan, District & Session Judge ka West Jaintia Hills, kala pynngat bad hukum ban set phatok shirta jingim ia u Weslyborn Pala ba khot sin u Nana Pala, uba dei na ka shnong Barato, namar ka kam pyniap briew.
Kane ka jingjia ka dei kaba naduh ka 6 tarik Nalar 2009, ha kaba u Weslyborn Pala ula pom da ka wait ia u Bransely Suiai haduh da iap, ha ka por 8 baje mynmiet.
Ia ka ejahar la mudui da ka kong Eragina Timung, khun jong une uba shah pyniap ha Nartiang Police Investigation Centre (PIC), ha ka 7 tarik Nailar, 2009.
Ia ka case la register hapoh ka Jowai Police Station bad la tohkit da u Sub Inspectir W Vaichel, uba la pynkhreh ia ka chargesheet pyrshah ia une u briew.
Hadien ka jingbishar kaba bniah bha, ka Iingkashari kala shem ba u Weslyborn Pala u donkti ha kane ka jingpyniap ia u Bransely.
Ka Iingkashari kala hukum ban set phatok shirta jingim ia u Weslyborn bad buh ia ka kuna ba un siew kaba long T. 5000. Ia kane ka hukum la pynmih ha ka 25 tarik Nailar.
