Shillong, Naitung 21 : Ka Iingkashari Meghalaya High Court ha ka sngi Nyngkong, kala pynmih ia ka hukum ba shipor, kaba bthah ia ka Sorkar Jylla ba kam dei ban pynduh ia ki lad jingmyntoi ba dei hok ban ioh, da ki briew ki bym pat don ia u Aadhaar number ne ka card.
Kala hukum ba ka Sorkar ka dei ban pdiang ia kiwei pat ki kot pynithuh (identification document) haba kynthoh ba ka jingbym don ia u Aadhaar number lane card kan ym dei ka jingpynduh ban ioh ia ki jing myntoi.
Ka hukum kala mih haba bishar ia ka public interest litigation (PIL) bala mudui da uwei u nongtrei mon sngewbha Greneth M Sangma, uba tynjuh pyrshah ia ka jingpyntip ba 31 tarik Risaw, 2023 jong ka Sorkar Jylla, kaba bthah ba ki khynnah kiba kwah ban ioh ia ki jingmyntoi ban ioh biang ia ka pisa ba leh (fee compensation) ia ka Post Matric Scholarship jong ki ST/SC (free studentship) (ka skhim) lane ka jingiarap pisa sha ki samla pule ST/SC ka Jylla ki bym ioh ia kano kano ka scholarship ba ki hap ban don ia u Aadhaar Identification Number.
Ia kane ka jingpynbna la pynshong nongrim halor ki artylli ki hukum jong ka Iingkashari Supreme Court ha ka mukotduma KS Puttaswamy (Retired) & and pyrshah ia ka Union of India & ors ha u snem 2015 bad kawei pat ha u snem 2019.
Ka Iingkashari ka sngew ba ka Aadhaar Act kam shym la pynduh ia ka hok jong kino kino ki briew ba kin ioh jingmyntoi lada kim don ia u Aadhaar number.
Kala ong ruh ba ka kyndon 7 jong ka Aadhaar Act, ka air uh ia kiwei pat ki lad ban pynithuh ia ki briew ki bym pat don ia u Aadhaar number.
“Namar kata, haba iadei bad ka jingpynbna ba 31 tarik Risaw, 2023, kum ka hukum ba shipor, ngi bthah ia ka Sorkar Jylla ba ka don ia ka hok ba pura ban pan ia ka Aadhaar number ne Aadhaar card na ki briew ban kloi ka jingpynithuh. Hynrei lada kino kino ki briew kim lah ban ai ne kim don ia u Aadhaar card ne number lane ki bym kwah ban leh Aadhaar, une u briew un hap ban pynshisha ia ka jingithuh ia u kum u nongshongshnong haba phai sha kane ka Act lyngba kiwei pat ki kot ki sla bala ithuh kum ka pan card, voter card, passport bad kiwei kiwei ki ba pynhun ia ki bor ka Sorkar Jylla” ong ka Division Bench u Chief Justice IP Mukerji bad Justice W Diengdoh ha ka hukum.
“Namar kata, ka jingbym lah ban ai ia u Aadhaar number lane ka card kan ym dei satia ka jingpynduh” kala ong.
Ia kane ka PIL yn sab uh thup ban shong bishar biang ha ka 12 tarik Nailar 2025, hadien ba ka Iing kashari kala shong pyrkhat bha ia kane ka kam, kynthup ia ka Aadhaar Act, Rules, ki hukum jong ka Iingkashari Supreme Court bad kiwei kiwei.
