Shillong, Rymphang 19 : Ka Iingkashari Meghalaya High Court kala hukum ia ka Sorkar Jylla ba kan thung ia ka jingtohkit halor ka jingkynnoh tih mawshun beain ha Ri-lum Jaintia da ka Amrit Cement Industries Limited.
Ia kane ka hukum la pynmih da ka Iingkashari Division bench ba kynthup ia u Chief Justice IP Mukerji bad u Justice W Diengdoh hadien ba shong bishar ia ka PIL ba mudui da u Ranjit Chandra Goswami.
“ Ha kane ka khyllipmat hashuwa ban pynmih ia kano kano ka hukum, ngi kwah ban iohsngew na u nongshah mudui no.9 bad ka jingwan mih u nongshah mudui ia uba la dep hukum ban phah ia kane ka hukum. Ia mynta, ngi bthah ia ka Jylla ban shim ia kane ka mudui kum ka jingujor, ban pynlong ia ka jingtohkit bad ban aiti ia ka kaiphod sha kane ka Iingkashari hashuwa ka sien shong bishar biang. La bthah ruh ba dei ban ai notice ia ka nongshah mudui no.9 kaba dei ka Amrit Cement Industries Limited” ong ka Iingkashari.
Kala bthah ruh ia ka jingshakri jong ka Meghalaya State Pollution Control Board (MSPCB) bad ka North Eastern Development Finance Corporation Ltd. La bthah ia u nongmudui ba un ai ia ka affidavit ba bniah halor ka kam ba u trei hashuwa ban shong bishar kam.
Ka hukum ka ong ba une u nongmudui, uba kam ba u dei u briew ba don ka mynsiem ban shakri paidbah, ula kynnoh ba ka Amrit Cement Industries Limited kala leh ia ka kam tih mawshun beain ha Ri-lum Jaintia.
