Shillong, Naiwieng 27 : Ka Iingkashari Meghalaya High Court ha ka sngi Balang, kala pynwai noh ia ka Public Interest Litigation (PIL) da kaba bthah ia ka Sorkar Jylla ban pynleit jingmut bha hapoh ka por kaba biang ban maramot ia ka surok Mawphlang-Balat.
Ka Iingkashari kala bthah ruh ia u nongmudui ba un iai shah khyndiat bad ap ia ka Sorkar Jylla ba kan shim ia ki sienjam haba ban jur ba kam kwah ban tuklar ia ki kam ba man ka sngi jong ka Sorkar lait noh satang lada don ka jingpulom kaba khraw ha ka jingtreikam.
Ka PIL kaba la mudui da u Baniarap Snaitang ka iadei bad ka jingmaramot bad shna pynkhlain ia ka surok Mawphlang-Balat. La kubir ba ka jingmaramot aila sdang da ka Sorkar Jylla bad ka dang iai bteng. Ka jingsngew khia jong u nongmudui ka long ba ka bynta jong ka surok na Phlangwanbroi sha Khliehriat bad na Pomblang sha Laitumsaw um shym la maramot satia bad donkam ban hap khmih ia ka.
Ha ka hukum bala pynmih hadien ka bishar ia ka mukotduma, ka Iingkashari ba kynthup ia u Chief Justice IP Mukerji bad Justice W Diengdoh kala ong “ Ka Iingkashari kam ju kham tuklar ia ki kam ba man ka sngi ha ka jingpyniaid kam jong ka Sorkar. Ka tuklar tang lada don ka jingbym lah treikam ki bor Sorkar, ka jingbym leh eiei na ki bor Sorkar kaba ktah ia u paidbah ba donkam ia ka jingtuklar jong ka Iingkashari”.
Ha kane ka kam, ka Iingkashari kala ong ruh “Ngi shem ba ka Sorkar kala shim ia ki sienjam ban maramot ia kane ka surok”.
Kala hukum, “U nongmudui u donkam ban iai shah khyndiat bad ap ba kan leh eiei haba iadei bad ka bynta jong ka surok hapdeng ka Phlangwanbroi sha Khliehriat bad Pomblang sha Laitumsaw”.
 da kaba bthah ia ka Sorkar Jylla ban pynleit jingmut bha hapoh ka por kaba biang ban maramot ia ka surok Mawphlang-Balat.){kind=link}