Shillong, Nohprah 15 : Ka Iingkashari Meghalaya High Court kala bthah ia ka Sorkar Jylla ba kan pynlong ia ka Weighbridge ha Ratacherra, East Jaintia Hills kaba treikam hapoh ka phra taiew.
Kane kala wan hadien ba ka Iingkashari kala shimkhia ia ka affidavit bala file da ki nongshah mudui ka Jylla, kiba la pynpaw ba ka weighbridge kam shym la treikam shuh naduh u bnai Nailur 2024.
“Ngi bthah ia ka Tnad Transport ban pyndep lut ia baroh ki kam khnang ban pynlong ia kane ka weighbridge kaba treikam noh hapoh ka phra taiew naduh mynta ka sngi” ong ka Division Bench ba kynthup ia u Chief Justice Soumen Sen bad Justice HS Thangkhiew ha ka hukum ba pynmih ha ka sngi Nyngkong.
Ka Iingkashari kala pynpaw ruh ia ka jingsngewkhia halor ki jingduna kiba don ha ka kaiphod bala aiti da ka Sorkar Jylla kiba iadei bad ka jinglong jingman ki weighbridge ha kylleng ka Jylla.
U Transport Commissioner ula aiti ia ka kaiphod ha ka 8 tarik Kyllalyngkot, 2025, ia kaba hadien la shem ba kam long satia kaba beit.
Ka Iingkashari kala maham ia ka Sorkar Jylla ba kan da phikir bha haba aiti ia ka kaiphod bad ban pyntip ia ki sienjam bala shim ban maramot ne pynieng ia ki weighbridge.
“Ka Sorkar ka dei ban phikir bha haba aiti ia ki kaiphod bad ban pyntip ia ki sienjam bala shim haba iadei bad ka jingtrei kam jong ki weighbridge, bad kumjuh ruh ia ka jingmaramot ne pynieng ia ki weighbridge ba pura, kat kaba long ka kam, ha ka kaiphod ban ai aiti ha lane shuwa ka sien shong bishar ban wan bad kiba hadien habud” kala ong.
Ia kane ka kam la rah ban bishar biang haduh ka 2 tarik Lber 2026, ha ryngkat ka jingbthah ban aiti ia ka kaiphod halor ki kam kiba la iaid.
