Shillong, Naiwieng 01 : Ka iingkashari Special Court (POCSO) ka East Khasi Hills, kala hukum ban set along haduh 14 snem lem bad ka kuna ba T. 50,000 ia ki arngut ki runar kiba leh beijot ia ka khynnah 12 snem ha ka shnong kaba hap hapoh ka Mawngap Police Station.
Kat kum ka jingiathuh u Superintendent of Police ka East Khasi Hills, kane ka khynnah ka dei kaba dang pule klas VII bad ki Pulit kila ioh pdiang ia ka ejahar ha ka 03/12/2018.
La iathuh ba kat kum ka ejahar, kane ka khynnah kala shah leh beijot la bunsien ha u briew uba kyrteng u Mortorjune Kharbani na 45-50 snem ha u snem 2017 hala ka jong ka Iingsah katba ka dang don marwei hala iing.
Ki Pulit kila register case ia kane ka ejahar ha Mawngap Police Station kat kum ka C/No. 56(12)2018 U/S 506 IPC r/w sec 5(l)(m)(n)/6 POCSO Act bad la tohkit ia ka da ka WPSI Larisha Kharjana.
La iathuh ba ha ka jingtohkit, la shem ba kane ka khynnah kala shah leh beijot ruh ha uwei u briew ba kyrteng u Lumding Syiemlieh. Hadien ba pyndep ia ka jingtohkit, kane ka heh pulit kala chare sheet ia kine ki briew ha ka 28 tarik Kyllalyngkot, 2019.
Ka Iingkashari Special Judge (POCSO) haba bishar ia kane ka mukotduma kala shem ba kine ki arngut ki briew kila donkti ha kane ka kam bymman bad ha ka 27 tarik Risaw, kala pynmih ia ka hukum ban set along ia kine ki briew haduh 14 snem lem bad ka kuna ba T.50,000.
