Shillong, Jymmang 02 : Ka Iingkashari Special Judge (POCSO) ka East Khasi Hills, SG Momin kala hukum ban set along haduh 20 snem ia u runar uba donkti ban leh beijot khynnah ha u snem 2022 ha ka thain Pynursla.
Une u runar u kyrteng u Tipborlang Rynjah uba la shah pynngat ha ka kyndon 6 jong ka POSCO Act bad ka kyndon 376AB/506 IPC.
Kat kum ka jingpyntip u Superintendent of Police ka District Bah Vivek Syiem, ka Iingkashari kala hukum ban set along ia une u runar haduh 20 snem hapoh ka kyndon 6 jong ka POCSO Act bad ban siew ia ka kuna ba T. 15,000 bad lada ym lah siew, un hap shong along sa lai bnai.
U pyntip ba ha ka kyndon 376AB IPC ruh la hukum ban set along haduh 20 snem lem bad ka kun aba T.15 hajar bad lada ym lah siew, un hap shong along sa lai bnai.
Ia kane ka kam bymman la tohkit da u Pulit UBSI George Dkhar uba trei ha Pynursla Police Station bad ka WPSI Shidarisha Kharsati kaba trei ha Women PS, East Khasi Hills lem bad ka WPSI W Khongsit kaba don mynta ha ka Women PS, Ri-Bhoi.
