Shillong, Iaiong 12 : Ka Iingkashari Meghalaya High Court hynne ka sngi Balang, kala hukum ban buh da 10 pyrton ki Central Armed Police Force (CAPF) ki ban tehlakam ia ka jingkhaii ia u dewiong ba tih be-ain hapoh ka Jylla.
Ha ka hukum, ka Iingkashari Full bench bala khlieh da u Chief Justice Sanjib Banerjee kala ong “…bad ka Union Ministry of Home, lyngba u Union Home Secretary, la bthah ban pynthina ia ka jingphah ia 10 pyrton ki CAPF ki ban pyniaid dalade ne ryngkat bad ki Ophisar na ka Tnad Pulit ban sa jied da ka IIngkashari, thik tang ban peitngor ha ki surok bad ban tehlakam ia ka jingkhaii beain ia u dewiong ba tih beain ha ka Jylla”.
Ka IIngkashari kala hukum ruh ba ka Sorkar Pdeng kan ai jubab lyngba u Secretary ba dei khmih ha ka por ban tian bishar biang ia kane ka kam hadien 2 taiew.
Kane ka hukum kala mih hadien ba u DSGI Dr Mozika ula pyntip ba ka Central Industrial Security Force (CISF) kala kyntait ban shimti ia ka kam ha kaban phah ia 10 pyrton ki pulit na ka bynta ban tehlakam ia ka jingkhaii beain ia u dewiong ha ka Jylla, namar ka daw ba kane ka kam, kam iahap satia bad ki rukom treikam jong kane ka Tnad.
Hynrei, ka hukum ka ong ba ka Iingkashari kam shym la jied thik tang ia ka CISF hynrei kala phah wad ia ki lad ki lynti ban phah da ki Central Reserve Police Force (CRPF) bad ka kamram ka long ba kin tehlakam ia ka jingkhaii tuh ia u dewiong ha ka Jylla.
Dei ha kane ka khep ba la ai jingmut haka jaka jong ka Sorkar Pdeng ba namar ka CRPF ka treikam hapoh ka jingbthah jong ka Tnad Pulit bad ka jingthmu jong ka Iingkashari ka long ban nym pyndon bynta ia ka Tnad Pulit ka Jylla namar ka jingbym lah treikam, kumba la ai jingmut b aka CISF kan dei kaba biang bha ia ka kam.
Ka Iingkashari kala buh ban bishar biang ia kane ka mukotduma ha ka 27 tarik u Iaiong.
