Shillong, Rymphang 13: Ka Director General of Police (DGP) Idashisha Nongrang kala thung ia ka Special Investigation Team (SIT) ban tohkit ia ka daw tynrai halor ka jingbthei ka par tih dewiong beain ha Mynsngat -Thangsko, kaba la shim ia ka jingim ki 31 ngut ki nongbylla bad pynmynsaw ia bun ngut.
“Halor ka jingjia bthei ka par dewiong dang shen ba Thangsko, East Jaintia Hills, Khliehriat bad ban pynthikna ia ka jingtohkit ba khuid, ka bym shah liang bad ba sted halor ki daw ba lam sha kane ka jingjia, ka DGP, Meghalaya ka sngewbha ban thung ia ka Special Investigation Team (SIT) mar mar” ong ka kong Nongrang ha ka hukum.
Ka SIT ka ban don khyndai ngut ki dkhot, kan dei kaba khlieh da u Dy Inspector General of Police (ER) Vivekanand S Rathore.
La bthah ia ka SIT ba kan pynthikna ia ki daw bad kiei kiba jia kaba lam sha kane ka jingjia, ban pynlong ia ka jingtohkit kaba bniah ia ka jingjia bthei ka par dewiong ha Thangsko bad ban ithuh ia ka jingpynkhein ia ki hukum ka Iingkashari/ NGT ba iadei bad ka kam tih dewiong.
“Ka SIT kan pynthikna ruh ba ka jingtohkit kan iaid kat kum ka jingbuhpor khnang ban lah pynkut ia ka case ha ka rukom kaba dei bad ban pynthikna ia ka jingai ia ka jingbishar ba hok kat kum ka ain” ong ka hukum.
Ha ka 9 tarik Rymphang, ka Sorkar Jylla kala pynsangeh noh ia ka jingiawad ia ki briew ha kane ka par ba tih dewiong beain hadien ba ki Kynhun ai jingiarap kila peitthuh bad shem ba kam don lynti shuh ban lap ia ki briew ba dang sahkut shapoh ka par.
U Myntri Rangbah ka Jylla Conrad K Sangma ula pynbna ban thung da ka Judicial Inquiry Commission ban pynthikna ia ki daw ha lyndet kaba lam sha ka jingbthei ka par bad ban tynrong ia ka jingbahkhlieh halor kane ka jingjia.
 Idashisha Nongrang kala thung ia ka Special Investigation Team (SIT) ban tohkit ia ka daw tynrai halor ka jingbthei ka par tih dewiong beain ha Mynsngat -Thangsko, kaba la shim ia ka jingim ki 31 ngut ki nongbylla bad pynmynsaw ia bun ngut.){kind=link}