Guwahati, August 28: U Nongseng bad u Chancellor jongka USTM (University of Science and Technology Meghalaya) u Mahbubul Hoque ula ai da ka OBC certificate kaba thok bad la pynduh noh ia katei da u DC ka Karimganj, ong u Myntri Rangbah ka Assam u Himanta Biswa Sarma.
U Myntri Rangbah ka Assam u Himanta Biswa Sarma ula pynbna ia katei hynne ka sngi Balang, ha kaba ula ong, ba ka jingshim ia ka Caste Certificate lyngba ka lynti kaba shukor kadei kaba be-ain bad ula bthah ia u District Commissioner ka Karimganj u Mridul Yadav ban shim ia ka sienjam katkum ka lynti ka ain.
“Ngi mutdur ba u Chancellor ka USTM yn dei u nonghikai. Hynrei ka kaiphod na u DC ka Karimganj kala lap ba ula leh ia ka kam thok ban ioh ia ka OBC certificate, ia kaba hadien la pynduh noh da u DC. Hato uno uno uba bat ia ka OBC certificate kaba shu thok, yn dei shisha u nonghikai ?” la buh jingkylli u Sarma ha ka jingiakren bad ki lad pathai khubor.
