Guwahati, Rymphang 18: U Myntri Rangbah (CM) ka Assam, u Himanta Biswa Sarma ha ka sngi Thohdieng ba la lah u la ong ba ka jingkhynra pyrshah ia ki kam pyniathoh shongkurim khynnah (child marriage) kan dang iai bteng.
Haba kren sha ki lad pathai khubor, u Himanta Biswa u la ong; “Ka sorkar jylla kan pynduh jait ia ka kam pyniathoh shongkurim khynnah ha Assam kat haduh u snem 2026.Ka jingkhynra halor kiba kum kine ki kam beain kiba ktah ia ka imlang ka sahlang kan dang iai bteng, bad mynta ka sngi Thohdieng Nga la iakren ia kane ka mat bad ki DC bad SP ka jylla.”
“Kiba bun ki briew kiba thmu ban pyniathoh ia ki khynnah kynthei kiba dang hapoh ka 18 snem rta ki la pynkut noh ia ki jingthmu jong ki.Ki briew ki la wan shakhmat bad bishar bniah ha ryngkat ki pulit la ki lah ne em ban pyniathoh shongkurim hadien ba ka kynthei ka la kynjoh sha ka 18 snem ar bnai lane lai bnai.Ka la don ka jingpynshai paidbah kaba jur halor kane ka bynta,” ong u CM Sarma.
Nalor kata u Sarma u la ong ruh ba tang 98 ngut ki briew kiba la ioh jamin. “Ngin shim ia ki sienjam kiba pyrkhing ban khanglad ia kiba kum kine ki kam beain.Ka sorkar jylla ka la sdang ia ka jingkhynra halor ka kam pyniathoh shongkurim khynnah naduh ka 3 tarik mynta u bnai, ha kaba haduh palat 3,000 ngut ki briew kiba la shah kynnoh donkti ha ki kam pyniathoh shongkurim khynnah ki la shah kem noh.
Na ka liang ka kynhun myntri ka jylla dang shen ka la mynjur halor ka jingtyrwa ban pynngat ia ki shynrng kiba iathoh shongkurim bad ki khynnrah kynthei kiba dang hapoh ka 14 snem rta ha ki kyndon Protection of Children from Sexual Offences Act, 2012 (POCSO).
