Shillong, Naitung 04 : Ka Iingkashari Meghalaya High Court ha ka sngi Ba-ar, kala pynpaw ia ka jingidonkam tohkit da ka Central Bureau of Investigation (CBI) halor ka kam tih beain bad khaii ia u dewiong hapoh ka Jylla haba maham ba ka Sorkar Jylla kan hap shim ia ka jingkitkhlieh lada jia eiei ia ki nongmudui pyrshah ia ka kam tih dewiong beain bad ka jingtreikam ki karkhana coke ba beain.
Kane kala mih hadien ka video bala wanrah hakhmat ka Iingkashari, haba bishar ia ka PIL bala mudui da u Champer M Sangma.
Ka bynta ba nyngkong jong ka video ka pyni ia ka jingtih dewiong beain ba pathar bad ka jingkhaii ia une u dewiong ba tih beain ha ki district bapher bapher kynthup ka West Khasi Hills, South West Khasi Hills, East Jaintia Hills bad South Garo Hills.
Ka bynta ba-ar jong ka video pat ka pyni ia ki jingring dur na ki satellite ia kiba bun ki jaka, kiba pyni ia ki jaka ba bun bah bala theh ia u dewiong ba dang shu tih thymmai.
Hynrei, u Deputy Commissioner ka South Garo Hills ula kam, hadien ba peit ia kine ki video, ba une u dei u dewiong bala dep ban kurup. U DC ula kam b aula don ha Ophis ha baroh kine ki hynriew bnai.
Ha ka hukum, ka Division Bench kala ong “Namar ki hukum bala iai pynmih ha kine ki 15 bnai kila seisoh tang khyndiat eh bad ka jingkhaii tuh ia u dewiong ka don ka jingiadei bad ki Jylla ba marjan khamtam ka Assam, lehse la donkam naka bynta ka jing myntoi uba bun balang ba ka CBI kan tohkit ia kane ka kam kynthup ia baroh ki jingkynnoh, ki video bala ring, ki dur bad kiwei kiwei ki sakhi bala aiti da ki nongmudui bapher bapher halor kane ka kam”.
Ka hukum ka ong ba uwei u Nongmudui ba iadei bad kane ka kam, kaba la wan ha ka jingbishar ka Full Bench ha ka 3 tarik Naitung, 2023, ula kam b aula shah byrngem ha uwei na ki kingpin ban leh da kaba tyngeh lada u dang iai bteng ia ka mukotduma haba bynrap ba wat u nongmudui ia kane ka mukotduma ba mynta ruh, ula pynpaw ia kajuh ka jingsngew syier iala ka jong ka jingim.
Haba pynpaw ba ka Sorkar Jylla kan hap shim ia ka jingkitkhlieh lada jia eiei ia kine ki nongmudui, ka Iingkashari kala ong “Naba, la kyrmen skhem ba ka ain ka dang treikam ha Jylla, khlem da iakren ia ka jingpynkhein ia ka hukum jong ka Iingkashari Supreme Court ba khang ia ka jingtih dewiong beain da ki bor Sorkar bad ka jingphai lyndet da ka Tnad Pulit, la tynrong ha ka Sorkar ba lada jia eiei wat tang iwei I dak mong ia ki nongmudui jong kane ka mukotdima lane kino kino ki kam ba iadei bad ka jingtoh dewiong beain bad ka jingtreikam ki karkhana coke ba beain, ka Sorkar kan hap ban shim ia ka jingkitkhlieh”.
Ka hukum ka ong ruh ba kumba ka ioh jingtip na kawei ka kam, ka Sorkar Jylla kala shah maham ha ka Sorkar Pdeng kynthup na u Myntri ka Tnad Finance ka Sorkar Pdeng, ba ka dei ban khang pyrshah ia ka jingkhaii tuh ia u dewiong bala tih beain ha Jylla da kaba pyndonkam ia ki kot ki sla ba shu shna thok.
Ka Iingkashari kala buh ban shong bishar biang ia kane ka mukotduma ha ka 13 tarik u Naitung.
Pule ruh: Khlieh u Commissioner & Secy ia ka Committee ban wad Chairperson thymmai ka MSCW
 halor ka kam tih beain bad khaii ia u dewiong hapoh ka Jylla haba maham ba ka Sorkar Jylla kan hap shim ia ka jingkitkhlieh lada jia eiei ia ki nongmudui pyrshah ia ka kam tih dewiong beain bad ka jingtreikam ki karkhana coke ba beain.){kind=link}