Nongpoh, Iaiong 10 : Ka Iingsah jong ka MDC ka NPP na Umsning Constituency Kong Magdalene S Mawlong, la suba jur ba kala shah kawang maw hynne ka janmiet sngi Balang, ha ki riew runar ki bym lah satia ban tip.
Kane ka Iingsah jong kane ka MDC ka dei kaba don ha Ladsharai, Ri-Bhoi District.
Katkum ka Khubor, la iathuh ba mar syn kem dum ka bneng, la suba jur ba ka kynhun ki riew runar kila leit lun maw ia ka Iingsah jong kane ka MDC.
Ki Pulit ka Umiam Police Station haba ioh jingtip ia kane ka jingjia, kila hiar wut wut sha Ladsharai ban leit tohkit bad pynthikna ia kane ka jingjia.
Ki Pulit kila lap ia bun tylli ki maw ha phyllaw jong kane ka Iingsah ka MDC bad mynta ki dang pynlong ia ka jingtohkit ban pynshisha ia ka jingshah lun maw.
Lah ban kdew hangne ba kane ka jingjia kala jia tang arsngi hadien ka jingkulmar kaba mih hapdeng ka jingialang ialap elekshon jong ka NPP ha Umsning namar ka jingleit pynthut jong ki nongkyrshan ka VPP.
