Shillong, Rymphang 04 : Ka kynhun ka State Disaster Response Force (SDRF) ka East Khasi Hills, kala hiar mynta sha Marten, ban iarap wad lem ia u nongtam marjot, uba shah tepim mynta la palat 24 kynta ha ki niut ba twa ha Marten.
Kat haduh mynta, ki nongwad ia ka met une u rangbah kim pat lapdien satia namar ka jingbun palat ka synrum kaba la twa bad ka jingmeh ding ki niut, kaba la buh ha ka jingeh ia ki ban wad.
Une u nongtam marjot u kyrteng u Bah Marshal Marwein ba 30 snem ka rta, uba shong ba sah ha Mawiong. Une u briew ula shah taplup ha ki niut hynnin ka step sngi Saitjain na ka jingtwa kynsan u niut sha ka jaka ba u dang tar marjot. Kane kala jia hynnin ka step por 8:30 baje eiei.
