Shillong, Nohprah 04: Ka Khasi Students’ Union War Jaintia Circle bad ka Khasi Students’ Union West Jaintia Hills District ha ryngkat ka H.N.Y.F Southern Riwar Circle ha ka 3 tarik mynta u bnai kala hiar sha ka Shnong Rongkum Amlympiang ban pynsangeh mardor ia ka jingpyntrei ia ka Border Fencing ne jingker sainar ha kitei ki jaka.
Kine ki ar seng marsien ioh jingtip ba ka Sorkar kala sdang ban iaid shakhmat ia ka jingker sainar, ki la leit ban pynsangeh shi syndon bad ban beh ia kine ki nongtrei jong ka Company namar haduh mynta ym pat lah ban pynthikna ia u pud u sam bad ba dei ban ker na Zero Point.
Kine ki ar Seng kila pynpaw ba kin ym pdiang ia kane ka jingleh jong ka Sorkar ha shilynter u pud u sam jong ka India bad Bangladesh hapoh War Jaintia.
Kila pynpaw ba lada ker sainar 150 yard kan sa ktah lut ia ki jaka ki puta jong ki paradoh parasnam kiba im ha katei ka thain, khamtam kiba im ha ka rep ka riang bad ki shnong ha khappud kin duh ia u pud shnong pud thaw.
Ki ar Seng ki pynrem jur ia ka Sorkar khamtam ia u M.L.A ka thain kiba nud ban iaid shakhmat ban lilam ia ki jaka ki puta jong ki paradoh parasnam sha ka Ri Bangladesh.
Kila ong ba kum u Nongmihkhmat ha ka jingshisha ula dei ban long u nongiada ia ka hok longbriew manbriew jong ki paradoh parasnam bad ban ieng Rangbah na ka bynta ka jingmyntoi jong ka thain War Jaintia kumba ula kular ha u snem 2018 ba shi ishi ka jaka ruh kan ym leit sha ka Ri Bangladesh, hynrei mynta pat ki kular kila kylla khongpong bad ula pynshong syier ia ki paidbah jong ka thain kiba don sha khappud lyngba ka jingthmu bad ki jingailad jongu ia ka Sorkar ban iaid shakhmat ia ka jingker sainar shiah.
Ki ar Seng ki dawa na ka Sorkar bad na u M.L.A ba ki dei ban pyndam shwa shi syndon ia ka hukum bad ban shim ia ki lad ki lynti kumno ban iada ia ki paradoh parasnam kiba don jaka sha ki thain khappud.
