Lashai ka sngi yn wan poi u Shankaracharya Avimukteshwarandah ha Umroi
Shillong, Nailur 27 : Ka Khasi Students’ Union (KSU) bad Hynniewtrep Youth Council (HYC) hynne ka step sngi Thohdieng, kila iahiar sha Shillong Airport, Umroi, ban khang bad beh ia ka kynhun Hindu kiba thmu ban wan pynlong rally ialap khang bam doh masi ha nongbah Shillong.
Kine ki artylli ki Seng kila poi sha Shillong Airport naduh ka por 11 baje tam halor ka jingioh khubor ba ki Nongialam ka kynhun Jyotish Peethadheeshwar Shankaracharya Avimukteshwarandah kan wan poi mynta ka sngi por 12 baje ha Umroi Airport.
Ka Jyotish Peethadheeshwar Shankaracharya Avimukteshwarandah kala pynbna ban wan pynlong ia ka Gau Dhwaj Sthapana Bharat Yatra ha Shillong ha ka 2 tarik Risaw, ban pynbna ia ka ‘Masi kum ka Kmie jong ka Ri’.
“Ngi ioh khubor ba ka Kynhun ki “Nongdawa ban pynbna khang bam doh Masi”kan wan sha ka Jylla jong ngi lyngba ka Umroi Airport ha kaba kin hiar ha Umroi ha ka por 12baje nohphai sngi mynta ka 27 tarik. Kum ka Seng ngi lah ieng skhem naduh kaba nyngkong ba ngin nym shah ia kine ki kynhun ban wan batai stad bad pynbor ia ngi ia ka rukom bam, rukom im ka jong ngi” ong ka HYC ha ka kyrwoh bala pynsaphriang ha ki rynsan social media.
“Kumba ki la shah beh ha Arunachal Pradesh bad ha Nagaland, ngi hangne ruh ngin nym ailad ia kine ki briew ba kin wan rung” kala bynrap.
Ka HYC kala khot bad iawer ia ki paid Khasi ba kin iamih paidbah ban ialum ha Shillong Airport ban pyntikna ba kine ki briew kim dei ban wan rung hapoh u pud u sam ka Bri u Hynniewtrep.
U National Media In-Charge ka kynhun Jagatguru Shankaracharya Maharaj u Shailendra Yogi Sarkar haba iakren lyngba ka Phone ula pyntip ba u Nongialam ka kynhun, u Shankaracharya Avimukteshwarandah, un wanpoi sha Shillong haka 28 tarik mynta u bnai.
“U Swami Ji un wan lashai ka 28 tarik sha Meghalaya haka por 12 baje lyngba ka kad Lengsuin Umroi Airport” ula ong.
U pyntip ba u Swami Avimukteshwaranand hadien ba poi ha Shillong Airport, un sa pynher ia ka lama masi hapoh ka Gau Dhwaj Sthapana Bharat Yatra bad ban dawa pynbna ia ka masi kum ka “Kmie ka Ri’ nalor ban pyntreikam ia ka Ain da ka Sorkar Pdeng ban khang noh ia ka jingshoh doh ia ka masi”.
Haba pyrshang ban wad jingtip na u Deputy Commissioner (DC) ka Ri-bhoi District u Abhilash Branwal u la ong “Ngi ruh ngi dang wad jingtip ia kane. Ka bor District kam don eiei ban ong halor kane namar kam lah ban khang ia ka jingwan jong u.”
Haba kylli halor ka jingthmu ban pynlong Rally, u DC u la ong ba kata ka kynhun ka khlem thmu eiei ha Ri-bhoi District.
 bad Hynniewtrep Youth Council (HYC) hynne ka step sngi Thohdieng, kila iahiar sha Shillong Airport, Umroi, ban khang bad beh ia ka kynhun Hindu kiba thmu ban wan pynlong rally ialap khang bam doh masi ha nongbah Shillong.){kind=link}