Shillong, Nailar 22: Ka Federation of Khasi Jaintia and Garo Peoples hynne ka sngi ba-ar kala leit lum nuksa ia ka um kor sorkari na ki 51 tylli ki jaka jong ki shnong ka Nongbah Shillong bad phah test ia kane ka umbam umdih ban pynthikna la ka long ne em kaba bit ba biang ban pyndonkam bad dih da ki paidbah.
Ka seng FKJGP hapoh ka jingialam u President u Bah Dundee Khongsit kila leit ban lum nuksa ia ka um kor sorkari naduh ka por 8 baje mynstep bad ia kine ki nuksa bala lum na ki 51 tylli ki jaka, la wanrah sha ka Food Safety Laboratory kaba don ha Lawmali, Shillong.
“Ka daw kaba la pynlong ia ngi ban lum ia ka umbam umdih na nongbah Shillong kadei hadien ba ngi la ioh ia ka jingujor na ki paidbah halor ka jingjaboh ka um. Da ka jingphah test ngin lah ban tip ia ka jingshisha, la ka um kaba ki paidbah ki ioh kadei ka bit ba biang ban pyndonkam ne kam long kaba bit ba biang ban pyndonkam” ong u Bah Dundee.
Ula ong, ba ka seng kan sa ioh ia ka kaiphod hadien 14 ne 15 sngi halor kane ka jingleh test haba pyntip ba ka seng kala bud kat kum ki kyndon ha ka rukom lum ia katei ka um na ki kor sorkari.
U nongialam ka FKJGP ula ong, ba ia mynta ka seng kan ap ia kaei kaba mih na ka kaiphod hadien ba la dep ban test khnang ba yn ioh ban pynbna sha ki paidbah ia ka jinglong jingman jongka umbam umdih.
“Lada jia ba ka umbam umduh kaba ki paidbah ki dih bad pyndonkam kaba pynbiang da ka tnad Public Health Engineer (PHE) bad ka Shillong Municipal Board kim long kiba bit ba biang ban dih ne pyndonkam, ka seng kan hap ban pynlong ia ka jingiakhih” ula ong
Une u Nongialam ka FKJGP ula ong ruh ba ka sorkar kadei ban shim ia ka jingkitkhlieh ba kan pynbiang ia ka um kaba khuid ba suba sha ki nongshong shnong ka jylla bad kadei ka hok jong ki paidbah ban ioh da ka umbam umdih kaba khuid bad kaba bit ba biang ban pyndonkam.
Nalor kane, ula ong,ba ka seng ka don ruh ia ka jingthmu ban lum ia ka um na ki shnong kiba don ha ki thain nongkyndong ban phah test ha ka ban lap la ki long kiba bit ba biang ne kiba shngain ban dih ne pyndonkam.
Pule ruh: Manipur : Ioh kurup biang ki Pulit ia 7 tylli ki suloi bad 81 tylli ki kuli ba shah tuh
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
