Shillong, Jylliew 30: Ki bor pyniaid District ha ka step sngi Nyngkong, kila hiar kyndang ia ki nongshong dukan madan ha ki thain Khyndailad, Police Bazaar kiba shong dukan khlam ka Certificate of Vending ne CoV, bala ai da ka Shillong Municipal Board.
Kane ka jingkyndang ia ki dukan madan kala sdang naduh ka por 9 baje eiei bad ka jingkyndang ka long beit thik tang ia kito ki dukan ki bym don ia ki CoV. Hynrei ia kiba don CoV la aipor ba kin kynriah noh ia ki dukan jong ki sha ki jaka bala ai da ka Sorkar ha ka Vending Zone kaba la buh ha ka mala kaba halor duh jong ka MUDA complex.
Ia kine ki dukan ba don CoV la aipor khatduh ba kin pynkynriah ia ka dukan haduh ka 22 tarik u Naitung.
Kane ka sienjam bala shim da ka bor District ka dei ka rai jong ka Sorkar Jylla hadien ba kala pynbna ia ka Khyndailad kum ka ‘No Vending Zone” ban lah wanrah ia ka jingkylluid ki surok ba iaid ki kali, ki lynti ba iaid briew ban wanrah ia ka jingshngain bad khamtam eh ban pynurlong ia ka jingthmu ban pynkylla ia ka Khyndailad kum ka Pedestrian Zone lane ka Jaka iaid kjat ki paidbah bad ka Music Hub ka ban khring bad pdiang ia ki nongwan shangkai sha Shillong.
Kat kum ka jingiathuh u Myntri Sorkar Bah Paul Lyngdoh, ka Urban Affairs kala dep shna haduh 400 tylli ki dukan ban pyn shong ia ki briew ba ju shong dukan madan ha MUDA Complex. U pyntip ba ia mynta, ki dang don tang 248 ngut kiba la pynthikna ban pynkynriah noh iaki dukan jong ki sha kane ka Vending Zone.
